Azərbaycan, Daşkəsən, 27 may/ Trend , müxbir Q.Raqifqızı/ Azərbaycanın Şəmkir rayonunda 2 mindən çox abunəçinin yaşadığı altı kəndin təmin edilməsi üçün 9 km uzunluğunda yeni qaz kəmərinin tikintisi planlaşdırılır. Bu məqsədlə "Azəriqaz" QSC 400 min manat məbləğində vəsait ayırıb. Bu barədə çərşənbə axşamı Şəmkir rayonu Qaz istismarı İdarəsininin rəisi Vaqif Məmmədov məlumat verib.
Bu ildən digər yaşayış məntəqələrinin də qazla təmin edilməsinə başlanılıb. Bu məqsədlə iki istiqamətdə mövcud qaz xəttlərinin bərpasına və yenilərinin çəkilməsinə başlanılıb, görülən işlər nəticəsində 370 abonentə qazın verilməsi reallaşıb.
Məmmədov bildirib ki, işləri bu cari ilin sonunadək başa çatdırmaq planlaşdırılır. O, həmçinin, qeyd edib ki, növbəti ildə daha 14 kənd qazla təchiz ediləcək.
2010-cu ilə Şəmkir rayonunda qazla təmin edilməmiş abunəçi qalmayacaq ki, bu da abunəçilərin sayını 35 minədək artırmaq deməkdir.
1995-ci ildə Şəmkirə qaz verilməsi tamamilə dayandırılıb. Hazırda rayonun yaşayış məntəqələrinin 90 faizi təbii qaz alır.
