Qazaxıstan, Astana, 04 iyul / Trend , müxbir K.Konırova/ Qazaxıstan Azərbaycan və Gürcüstanla Bakıdan Batumiyədək yeni neft kəmərinin tikintisi üzrə danışıqlara başlayıb. Bu barədə cümə günü Astanada Trend ın xüsusi müxbirinə "KazEnergy" Assosiasiyasının sədri Timur Kulibayev məlumat verib.
"Azərbaycan və Gürcüstan Bakıdan Batumiyədək yeni neft kəmərinin tikinti layihəsini dəstəkləyirlər", - deyə Kulibayev bildirib.
Onun sözlərinə görə, yeni boru kəməri üzrə ilkin mərhələdə ildə 10 mln. tonadək Qazaxıstan neftinin nəqli nəzərdə tutulur, o cümlədən, operatoru Amerikanın "ChevronTexaco" şirkəti olan "Tengiz" yatağından.
Kulibayev bildirib ki, hazırda Qazaxıstan BP-nin rəhbərlik etdiyi Azərbaycan Beynəlxalq Əməliyyat Şirkətinin (ABƏŞ) operatoru olduğu Bakı-Supsa neft kəmərinin gücündən istifadə imkanlarını da nəzərdən keçirir.
Bakı-Supsa boru kəməri ilə 2006 -cı ilin payızınadək BP-nin operatoru olduğu "Azəri-Çıraq-Cünəşli" yatağından hasil edilən Azərbaycan yüngül nefti nəql olunub. 2006 -cı ilin payızından təmir işlərilə əlaqədar nəql dayandırılıb. Hazırda boru kəməri üzrə təmir işləri başa çatdırılıb. Bakı-Supsa üzrə Azeri Light növlü neftin nəqli həyta keçirilir.
Bakı-Supsa boru kəmərinin uzunluğu 827 km təşkil edir. Boru kəmərinin nəql gücü ildə 6 mln. tondan çoxdur.
Məqalə müəllifi ilə əlaqə ünvanı: [email protected]
