Azərbayacn, Bakı, 01 avqust/ Trend , müxbir E.İsmayılov/ Azərbaycan Dövlət Neft Şirkətinin (ARDNŞ) Heydər Əliyev adına dərin özüllər zavodu avqustun sonunadək "Neft Daşları"dəniz neft yatağı üçün yeni ikibloklu platformanın tikintisini başa çatdıracaq, - cümə günü zavoddan bildiriblər.
"Tikinti davam edir və tikinti üzrə işlərinin bir ay ərzində başa çatdırılması nəzərdə tutulub", - zavoddan deyiblər.
Ikibloklu platformanın hündürlüyü 27 metr təşkil edir. O, 17 metr dərinlikdə quraşdırılacaq. Platformada ümumilikdə 12 quyunun qazılması planlaşdırılıb.
Əvvəl "Neft Daşları"dəniz neft yatağında ikibloklu "Neft daşları-2387" platforması istismara verilib. Platforma suyun 24,5 metr dərinliyində quraşdırılıb və 12 quyunun qazılmasına hesablanıb.
Yataqda 12 quyunun qazılmasına hesablanan "Neft daşları-2415" ikibloklu platformanın tikintisi də gedir. Platformanın və birinci quyunun dekabrda istismara verilməsi planlaşdırılıb.
2009-cu ilədək "Neft Daşları"neft-qazçıxarma idarəsi 20 yeni istismar quyusunu istismara verməyi nəzərdə tutub. Bu tədbirlər Azərbaycan Respublikası prezidentinin neft-qaz çıxarma idarəsində neftin 812 min tondan 1,2 mln. tonadək (1,5 dəfə) atrırılması ilə bağlı sərəncamı çərçivəsində görülür. 2008-ci ildə yataqda ümumi neft hasilatı 936 min 420 ton təşkil edəcək. Neft-qaz çıxarma idarəsi 2009-cu ildə neft hasilatını 1 mln. 20 min tona çatdırmaq niyyətindədir.
ARDNŞ-nin geoloqlarının qiymətləndirmələrinə görə, Neft Daşları" yatağında neft ehtiyatlarının həcmi 30 milyon təşkil edir. ARDNŞ yataqda neft hasilatının artırılması üçün 2010-cu ilədək daha 78 yeni quyu qazacaq.
