Azərbayacn, Bakı, 02 sentyabr/ Trend /Azərbaycan Dövlət Neft Şirkəti (ARDNŞ) sentyabrın sonunadək "Bulla-dəniz"dəniz yatağında platformanın yenidən qurulmasını başa çatdıracaq, - ARDNŞ-nin çərşənbə axşamı yaydığı məlumatda deyilir.
Platforma suyun 23 metr dərinliyində yerləşib. Orada 6400 metrlik iki qaz quyusunun qazılması planlaşdırılıb. Quyulardan biri axtarış-kəşfiyyat quyusu olacaq.
Platformanın üst qatının yenidən qurulması başa çatdıqdan sonra, burada əvvəllər istifadə edilməmiş Çin istehsalı olan qazma dəzgahı və vertolyot meydançası yerləşdiriləcək. Yeni qazma dəzgahı artıq platformadadır. Vertolyot meydançası Heydər Əliyev adına Dərin Özüllər zavodunda hazırlanıb.
Bir neçə ay əvvəl platformada 36 nəfərlik yaşayış bloku tikilib.