Azərbaycan, Bakı, 14 oktyabr/ Trend / SOCAR şirkəti (Azərbaycanın Dövlət Neft Şirkəti) iki ay ərzində "Şimal" elektrik stansiyası və Bakı ətrafının qazla təminatı üçün nəzərdə tutulan yeni Bahar - Hövsan - Suraxanı qaz kəmərinin sualtı hissəsinin tikintisini başa çatdıracaq, - SOCAR-ın çərşənbə axşamı yayılan məlumatında bildirilir.
Kəmərin sualtı hissəsinin 13 kilometri artıq çəkilib. Boruların düzülməsini "Süleyman Vəzirov" gəmisi həyata keçirir. Boruların sahildən çatdırılması ilə "Oqtay Vəliyev", "Nerça" və "Aura" yedək gəmiləri məşğul olur.
20 düymlük Bahar - Hövsan - Suraxanı boru kəmərinin ümumi uzunluğu 49 kilometrdir (sualtı hissəsi 37 km, yerüstü - 12 km). Boru kəmərinin sutkalıq ötürmə gücü 5 mln. kubmetr qaza bərabərdir. Onun çəkiləcəyi dərinlik 12-16 metr arasında dəyişir. Qaz kəmərinin sualtı hissəsinin sifarişçisi "28 may" Neft-Qaz Çıxarma Idarəsi, yerüstü hissənin sifarişçisi Qaz Əməliyyatları Idarəsidir.
Boru kəməri ilə "Günəşli" dəniz yatağından hasil edilən qaz nəql ediləcək. Boru kəmərinin layihəsi "Dənizneftqazlayihə" institutu tərəfindən hazırlanıb. Boruların betonlaşdırılmasını Caspian Pipe Coatings zavodu həyata keçirib. Boru kəməri 2008-ci il üçün qaz proqramı çərçivəsində istismara veriləcək ən iri obyektlərdən biridir.
Proqram SOCAR - ın şəxsi vəsaitləri hesabına işlədiyi yataqlardan hasilatı ildə 8 mlrd. kubmetrədək artırmasını nəzərdə tutur. Bu həcmin 7 mlrd. kubmetri dövlətə veriləcək. Şirkətin rəsmi saytında bildirilir ki, Caspian Pipe Coatings zavodunda iştirakın yarısı ona, 45 faiz Azertrans şirkəti və 5 faiz Azinvest-ə məxsusdur.
