Azərbaycan, Bakı, 29 oktyabr/ Trend / SOCAR "Günəşli-13" platformasında yeni neft-qaz quyusu istifadə verib. Bu barədə SOCAR-ın məlumatında bildirilir.
Quyunun orta ilik debiti 51 mln. kubmetr qaz və 10 min ton nefti üstələyir. Yeni quyunun dərinliyi 3023 metrdir.
2004-cü ildə istifadəyə verilən "Günəşli-13" platforması 20 quyunun qazılması üçün nəzərdə tutulub. Dörd il ərzində platformadan 10 quyu qazılıb və "28 may" Neft-Qaz Çıxarma İdarəsinin hesabına daxil edilib.
Bu il ərzində platformada dörd quyu istismara verilib. Platformadan daha 10 yeni quyunun qazılması planlaşdırılır.
"Günəşli" SOCAR-ın müstəqil istismar etdiyi ən iri neft-qaz yatağıdır. SOCAR-ın hasil etdiyi bütün neftin 60 faizi və ümumi qazın 70 faizi bu yatağın payına düşür.
Yeni quyuların qazılması üzrə işlər SOCAR-ın təsdiq etdiyi, "Günəşli" dəniz neft-qaz yatağını istismar edən "28 may" Neft-Qaz Çıxarma İdarəsinin 2008-2010-cu illər üzrə inkişaf proqramı çərçivəsində həyata keçirilir.
Proqram çərçivəsində neft hasilatının stabilləşdirilməsi və təbii qaz hasilatı həcminin artırılması planlaşdırılıb.
Məqalə müəllifi ilə əlaqə ünvanı - capital
