Azərbaycan, Bakı, 19 yanvar/ Trend / 2012-ci ilədək neftin qiyməti bir barelə görə 40 dollar göstəricisindən də aşağı düşəcəyi təqdirdə, Azərbaycan Dövlət Neft Fondunun (ARDNF) aktivləri hətta 100 mlrd. dollara çatsa belə, fondun ölkənin dövlət büdcəsinə köçürmələri nəzərəçarpacaq dərəcədə azaldılmalıdır. Bu barədə "Euromoney" jurnalına müsahibəsində ARDNF-in icraçı direktoru Şahmar Mövsümov bildirib.
"Lakin neftin qiyməti aşağı olduğu dövrdə, hətta ARDNF-in gəlirləri azaldığı bir şəraitdə də Azərbaycan hökuməti planlaşdırılan layihələrin reallaşdırılması üzrə səylərini davam etdirməlidir", - deyə Mövsümov bildirib.
Onun sözlərinə görə, 2009-cu ildə ARDNF-dən dövlət büdcəsinə 6 mlrd.dollar köçürülməsi planlaşdırılır. Bu vəsaitlərin əsasən ölkə infrastrukturunun inkişafına sərf olunması nəzərdə tutulub. Cari ildə dövlət xəzinəsinə planlaşdırılan köçürmələr bütün büdcə gəlirlərinin yalnız 40 faizini təşkil edir və bu köçürmə həcminin neftin büdcədə nəzərdə tutulmuş bir barelə görə 70 dollar qiyməti ilə həyata keçirilməsi planlaşdırılır.
"2009-cu ildə Neft Fondu SOCAR şirkətinin (Azərbaycan Dövlət Neft Şirkəti) dövlət büdcəsinə ödənişlər üzrə kəsirini örtməli olsa, ARDNF planlaşdırılandan daha az gəlirlərlə kifayətlənməli olacaq", - deyə Mövsümov bildirib.
Onun fikrincə, neftin qiymətləri artmayacağı təqdirdə, iki variant var: xərclərin azaldılması və ya köçürmələrin artırılması. Mövsümov birinci variantı daha məqsədəuyğun hesab edir.
ARDNF-in məqsədlərindən biri qeyri-neft sektorunun inkişafının stimullaşdırılmasıdır. Fondun dövlət büdcəsinə köçürmələri hesabına on yerli sosial-iqtisadi layihə maliyyələşdirilir. 2009-cu ildə Neft Fondunun 7 mlrd. dollar həcmində nəzərdə tutduğu yerli xərclərin ümumi həcmindən 6 mlrd. dollar dövlət xəzinəsinə, 1 mlrd. dollar isə birbşa bu layihələrin maliyyələşdirilməsinə yönəldiləcək.
Layihələr irriqasiya və su təchizatı, həmçinin Bakı-Tbiilsi-Qars dəmir yolu magistralının tikintisi və qaçqın və məcburi köçkünlər üçün evlərin tikilməsi işlərini əhatə edir.
Azərbaycan hökuməti neftin qiymətləri aşağı olacağı təqdirdə yüksək iqtisadi artım tempini saxlamaq üçün ARDNF-in yardımından istifadə edə bilər. 2009-cu ildə hökumət iqtisadi artım tempini 20 faiz səviyyəsində proqnozlaşdırır. Lakin gələcəkdə ölkənin daha çətin dövrə qədəm qoyacağı gözlənilir. Bunun əsas səbəbi gələcəkdə təkcə SOCAR şirkətinin gəlirlərinin azalması deyil. Mövsümov bildirib ki, əgər neftin qiyməti də aşağı olarsa, ARDNF-ə tələblər də artacaq.
Məqalə müəllifi ilə əlaqə ünvanı - [email protected]
