Azərbaycan, Bakı, 16 fevral / Trend , müxbir E.İsmayılov/ "Bakının bütün rayonlarında Fövqəladə Hallar Nazirliyinin (FHN) rəhbərliyi altında məişət qazından istifadə qaydalarında yol verilən pozuntular və onun sızması səbəblərinin aşkar edilməsi ilə bağlı xüsusi komissiyalar yaradılıb", - bazar ertəsi Yanacaq və Energetika Nazirliyi nəzdində dövlət qaz nəzarətinin başçısı Asif Zeynalov bildirib.
Son zamanlar, xüsusilə də qış dövründə soyuq və şaxtalı hava şəraiti üzündən vətəndaşlar texniki normativlərə cavab verməyən qaz isidicilərindən istifadə edirlər. Bu adətən ölümlə və ya səhhətə dəyən ağır ziyanla nəticələnən dəm qazı ilə zəhərlənmələrə, eləcə də yaşayış binalarında qaz sızması üzündən partlayışlara gətirib çıxarır. Bakıda belə faktların sayı xüsusilə çoxalıb. Son zamanlar belə hadisələr nəticəsində 30 nəfər ölüb, dəm qazından isə təxminən 200 nəfər zəhərlənib.
"Bütün rayonlarda komissiyalar artıq yaradılıb və bu məsələlərin təhqiqatına başlanılıb", - Zeynalov bildirib.
"Komissiyalar iki ay ərzində iş aparacaq və hökümətə son zamanlar çoxalmış qaz partlayışı və dəm qazı ilə zəhərlənmə halları ilə bağlı rəy təqdim edəcək", - Zeynalov əlavə edib.
Komissiyalar Azərbaycan Nazirlər Kabinetinin keçirtdiyi yanvarda qaz təsərrüfatından istifadə təhlükəsizliyi ilə bağlı iclasın protokolu çərçivəsində yaradılıb.
Məqalə müəllifi ilə əlaqə ünvanı: [email protected]