Azərbaycan, Bakı, 21 fevral / Trend , A.Bədəlova / Dünyanın ən iri banklarından olan Amerikanın JPMorgan bankının proqnozlarına əsasən, 2009-cu ildə neftə tələbat 1,6 mln barelə qədər azalacaq və 2008-ci ildə sutkalıq 85,9 mln barel neftə nisbətdə 2009-cu ildə sutkalıq 84,3 mln barel təşkil edəcək. Bundan əvvəl bank bu il üçün tələbatın sutkalıq bir milyon barel azalacağına proqnozlaşdırmışdı.
Bankın Trend -a verdiyi məlumata əsasən, 2008-ci ilin dördüncü rübündə neftə tələbat çox az olmuşdur və azalmanın cari ilin birinci rübündə də gözlənilməsi ehtimal olunur. Bankın analitiklərinin proqnozlarına əsasən, 2009-cu ildə 1,9 faiz enəcək dünya iqtisadi artımının əhəmiyyətli dərəcədə azalması tələbatın azalmasına təsir edib.
Bu il üzrə neftə tələbatın ən az ikinci rübdə sutkalıq 83,5 milyon barel olması gözlənilir. Dördüncü rübdə isə tələbat artaraq sutkalıq 85,2 milyon təşkil edəcək.
2009-cu ildə dünyanın neftə tələbatının ümumi həcmindən sutkalıq 46,2 milyon barel İqtisadi Əməkdaşlıq və İnkişaf Təşkilatı ölkərinin payına düşəcək, bu təşkilata daxil olmayan ölkələrin payına isə sutkalıq 38,1 milyon barel düşəcək.
Bankın proqnozlarına əsasən, 2009-cu il üzrə dünya neft tədarükünün ümumi həcmi iki milyon barel azalmaqla, sutkalıq 84,2 milyon barel təşkil edəcək.
Bankın proqnozlarına əsasən, OPEK-in neft tədarükünün həcmi bu il ərzində 2008-ci ildəki həcimdən iki milyon barel az olmaqla, sutkalıq 29,1 milyon barel təşkil edəcək. OPEK-ə daxil olmayan dövlətlər üzrə 2008-ci ildəki sutkalıq 48 milyon barelə nisbətdə 2009-cu ildə göstərici 48,1 milyon barel təşkil edəcək.
Məqalə ünvanı ilə əlaqə ünvanı: с[email protected]