Azərbaycan, Bakı, 10 mart / Trend , müxbir E.İsmayılov /
SOCAR (Azərbaycan Respublikası Dövlət Neft Şirkəti) "Azəri-Çıraq-Günəşli" (AÇG) yatağının işlənməsi layihəsi üzrə tərəfdaşları və Rusiyanın "Transneft" şirkəti ilə Bakı-Novorssiysk boru kəməri ilə daha çox neft ötürülməsinin mümkünlüyü ətrafında danışıqları davam etdirir", - SOCAR-ın yüksək vəzifəli məmuru məlumat verib.
"Danışıqlar həm Novorossiysk, həm də AÇG konsorsiumu ilə neftin mümkün doldurulması məsələsi ətrafında gedir", - SOCAR nümayəndəsi deyib.
Onun sözlərinə görə, bu proses həyata keçərsə, bu kəmərlə vurulan neftin bir hissəsi (ildə iki milyon ton) AÇG layihəsi çərçivəsində SOCAR və dövlətə məxsus olan neft olacaq. "Ancaq bu, yalnız ildə 5 milyon ton, o cümlədən 3 milyon ton AÇG nefti vurularsa, mümkün olacaq", - SOCAR nümayəndəsi bildirib.
Bakı-Novorossiysk boru kəməri ilə neftin nəqlinin artımı "Transneft"in Novorossiysk Qara dəniz limanında Azərbaycan yüngül neftinin keyfiyyətinin saxlanılmasını təmin edəcəyi halda mümkündür. Bu kəmərdən istifadə Azərbaycan neftinin nəqli marşrutlarının diversifikasiyası baxımından vacibdir.
SOCAR bu gün bu marşrutla ildə təxminən bir milyon ton neft nəql edir. Bura SOCAR-ın öz vəsaitləri hesabına yataqlardan hasil etdiyi, eləcə də birgə müəssisələr və əməliyyat şirkətlərinin xammalı aiddir.
Hazırda öz neftini dəmir yolu ilə Batumi limanına göndərən "Exxon" və "Devon" şirkətlərindən başqa, AÇG layihəsi üzrə bütün tərəfdaşlar öz neftini Bakı-Tbilisi-Ceyhan (BTC) boru kəməri ilə nəql edir.
Bakı-Novorossiysk boru kəməri ilə neft nəqli zamanı SOCAR çıxışda (Novorossiysk limanında) "Urals" markalı neft əldə edir ki, buna da səbəb başqa istehsalçıların nefti ilə qarışmadır.
Bakı-Novorossiysk boru kəmərinin operatoru qismində 2007-ci ilə qədər Azərbaycan Beynəlxalq Əməliyyat Şirkəti (ABƏŞ) çıxış edirdi. Sonradan qurum bu səlahiyyətləri SOCAR-a verib. Üstəlik, ARDNŞ nümayəndələri qeyd edir ki, ABƏŞ üzrə tərəfdaşlar ümumiyyətlə bu marşrutla gələcəkdə neft nəql etmək niyyətində deyildi. Ancaq Gürcüstanda ötən ilin avqustunda baş verən hadisələr üzündən ABƏŞ üzrə tərəfdaşlar (BTC layihəsinin iştirakçıları) bu marşrutla nəqli bərpa etməli oldu.
AÇG layihəsi üzrə tərəfdaşlar: BP (operator - 34,1%), ChevronTexaco (10, 2%), SOCAR (10%), İNPEX (10%), Statoil (8,6%), ExxonMobil (8 %), TRAO (6,8 %), Devon (5,6 %), ITOCHU (3,9 %), Hess (2,7%). Lazımi kapital qoyuluşlarının həcmi 20 milyard dollardır.
Məqalə müəllifi ilə əlaqə ünvanı: [email protected]