Türkmənistan, Aşqabad, 16 iyul / Trend , Q.Həsənov /
Xəzər sahilində yerləşən Türkmənistan və Azərbaycan Xəzərin delimitasiyası ilə bağlı danışıqları xarici işlər naziri müavinləri səviyyəsində bərpa ediblər.
Türkmənistan XİN-in verdiyi məlumata görə, iyulun 16-17-də Bakıda keçiriləcək görüş "hazırda Türkmənistan və Azərbaycan arasında Xəzər dənizinin dibi və yeraltı sərvətlərinin müəyyənləşdirilməsinə dair aparılan danışıqlar prosesinin növbəti mərhələsi"dir. Danışıqların yeni mərhələsi çərçivəsində həmin problemlər, həmçinin iki ölkənin Xəzərdə gəmiçilik, balıqçılıq, hidrometeorologiya və digər fəaliyyət sahələri üzrə məsələlərə münasibət haqda fikir mübadiləsi keçirmək planlaşdırılır.
"Xəzər dənizinin dibi və yeraltı sərvətlərinin iki ölkə tərəfindən bölünməsi haqda Türkmənistanın mövqeyi isə beynəlxalq hüquq və ədalət prinsiplərinin tətbiqi əsasında razılıq əldə olunmasından ibarətdir.", - məlumatda belə deyilir.
2007-ci ildə Türkmənistana Prezident Qurbanqulu Berdımuhamedovun başçılıq etməsindən sonra iki Xəzərsahili dövlət ikitərəfli əməkdaşlığa razı olduqlarını bildiriblər. Onun hakimiyyəti dövründə yüksək səviyyədə ikitərəfli görüşlər keçirilib, Bakıda Türkmənistanın səfirliyi öz işinə başlayıb, qarşılıqlı borc məsələsi həll edilib. Ötən illərdə ölkələr arasında sərhəddə yerləşən dəniz yataqlarının ərazi mənsubiyyəti ilə bağlı fikir ayrılıqları yaranırdı.
Hazırda Azərbaycan və Türkmənistana enerji daşıyıcılarının satış bazarını diversifikasiya etməyə imkan yaradan Türkiyədən keçməklə Avropaya Nabukko qaz kəmərinin tikintisi layihəsi üçün potensial xammal mənbəyi kimi baxılır.
Məqalə müəllifi əlaqə: [email protected]