Azərbaycan, Bakı, 16 iyul / Trend /
"Nabukko"nun Türkiyə hissəsinin tikintisi üçün birbaşa sərmayələr 4,5 milyard avro səviyyəsində gözlənilir ki, bu da ümumi xərclərin (7,9 milyard avro) təxminən 57 faizi deməkdir", - Nabucco Gas Pipeline int.-in saytında yerləşdirilmiş məlumatda deyilir.
"Nabukko"nun Türkiyə hissəsi ən uzun hissə olacaq. İki min kilometrlik hissə borunun ümumi uzunluğunun 60 faizini təşkil edir.
"Türkiyə layihəyə cəlb olunmuş digər ölkələr kimi, Nabucco Gas Pipeline tərəfindən ödənilən vergi ödəmələrindən xeyli gəlir götürəcək", - şirkətin materiallarında deyilir.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixrac etmək nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. 2015-c ildə kəmərlə ildə səkkiz milyard kubmetr qaz nəql ediləcəyi gözlənilir. 2018-ci ildə bu rəqəm ildə 15 milyard kubmetrə çatdırılacaq. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botaş və Almaniyanın RWE şirkətləridir. Onların hər biri bərabər paya - 16,67 faiz paya malikdir.
