Azərbaycan, Bakı, 26 oktyabr / Trend /
ARDNŞ 2010-cu ilin birinci rübündə Qaradağ yeraltı qaz anbarının yenidən qurulmasının birinci mərhələsini tamamlamağı planlaşdırır, bu barədə ARDNŞ-in bazar ertəsi yaydığı məlumatda deyilir. Hazırda xarici mütəxəssislər ilə birgə üç kompressor aqreqatlarının qurulması işləri gedir.
Qaz anbarının genişləndirilməsinin birinci mərhələsinin tamamlanmasından sonra anbarın aktiv gücü hazırkı 500 milyon kubmetrdən 1,45 milyard kub metrə kimi artırılacaq.
Birinci mərhələ quyuların təmiri, yerüstü kommunikasiyaların və kompressor stansiyasının inşasını nəzərdə tutur ki, bunun da nəticəsində qaz anbarına doldurulan qazın sutkalıq həcminin yeddi milyon kubmetrə kimi çatdırılması planlaşdırılır.
Qaradağ qaz anbarının genişləndirilməsinin iki mərhələdə həyata keçirilməsi planlaşdırılır, bunun da nəticəsində onun gücü 2,3 milyard kubmetrə çatdırılacaq.
Belə ki, dövlət komissiyası tərəfindən artıq "Qaradağ yeraltı qaz anbarında paylama məntəqəsinin inşası" və "Qaradağ yeraltı qaz anbarının yenidən qurulması çərçivəsində təmir olunan quyular və quyulara aparan yollar ətrafında abadlıq" çərçivəsində obyektlər qəbul olunub.
Qaz anbarının yenidən qurulması nəticəsində aktiv gücün hazırkı 500 milyon kubmetrdən 2,3 milyard kubmetrə kimi çatdırılması planlaşdırılır.
İstismara verilən qazpaylama məntəqəsi yaz-yay mövsümündə 32 quyudan qaz doldurulmasının təmin edilməsi və payız-qış mövsümündə çıxarılaraq istehlakçılara ötürülməsi məqsədilə inşa edilib.
Azərbaycanda cəmi iki yeraltı qaz anabrı mövcuddur - Qaradağ və Kalmaz yeraltı qaz anbarları. Kalmaz qaz anbarının aktiv gücü 1,1 - 1,2 milyard kubmetr təşkil edir.