Azərbaycan, Bakı, 30 oktyabr / Trend , müxbir E.İsmayılov/
ARDNŞ bir ay ərzində "Ələt Dəniz" dəniz yatağında yeni istismar quyusunun qazma işlərini tamamlamağı planlaşdırır. Bu barədə şirkətdəki mənbədən bildirilib.
"Ələt Dəniz - 63" platformasında 64 saylı quyunun qazılması çərçivəsində planlaşdırılan 3400 metrdən 250 metr qalıb. Bu templərlə qazma işləri bir ay ərzində başa çatacaq", - mənbə bildirib.
Yeni quyunun gözlənilən sutkalıq debeti 20 min kubmetr qaz və 50 ton neft həcmində qiymətləndirilir.
ARDNŞ həmçinin bu yaxınlarda "Ələt Dəniz - 18" (74 saylı quyu) platfomasında eyniadlı yataqda daha bir quyunun qazılmasını davam etdirir. Artıq 1800 metr dərinlikdə kənar sütunlarının qoyulması həyata keçirilib. "Kənar sütunlar artıq qoyulub və beton ilə doldurulub, hazırda onun qurumasını gözləyirik", - mənbə əlavə edib.
Yeni quyunun layihə dərinliyi 4000 metr təşkil edir ki, bunun da 80 metri artıq qazılıb. Quyunun qazılmasına dünən başlanılıb. Bu quyunun qazılmasını növbəti ildə tamamlamaq planlaşdırılır. Quyunun gözlənilən sutkalıq debeti təxminən 20 min kubmetr qaz və 40 ton neft təşkil edir.
Hər iki quyunun qazılmasını "Bayıl Limanı" Kompleks Qazma İşləri İdarəsi həyata keçirir.
Azərbaycanda 57 neft-qaz yatağı mövcuddur ki, onların 18-i dənizdə, qalanları isə quruda yerləşir. ARDNŞ əməkdaşlarının ştatı 62 min nəfər təşkil edir.
Məqalə müəllifi ilə əlaqə ünvanı: [email protected]