Azərbaycan, Bakı, 06 yanvar / Trend /
"ARDNŞ-ın Marketinq və İqtisadi Əməliyyatlar İdarəsi 2009-cu ildə Bakı-Tbilisi-Ceyhan (BTC) neft kəməri vasitəsilə 24,6 milyon tona yaxın Azərbaycan neftini ixrac edib. 2008-ci ildə bu göstərici 20,47 milyon ton təşkil edib", - bu barədə MİƏİ-nin məlumatında deyilir.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycanın, 249 km-i Gürcüstanın, 1076 km-i isə Türkiyənin ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci ilin mayında başlanılıb.
BTC neft kəmərinin inşası 4 milyard dollara başa gəlib. Bu, inşaat işlərinə sərf edilən vəsaitdir.
Boru kəmərinin doldurulması, maliyyə xərcləri və bank faizləri bu məbləğə daxil deyil.
Ümumi maliyyə kreditinin məbləği 2,6 milyard dollar təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).