Azərbaycan, Bakı, 10 avqust/Trend/
İran qazının Pakistana ixracı üzrə danışıqlar başa çatdıqdan və bu ölkə ilə qaz kəmərinin tikilməsi barədə razılıq əldə edildikdən sonra İran qazının Hindistana ixracı üzrə müzakirələrdə fəallaşma müşahidə ediməyə başlayıb. Bu barədə İranın Milli qaz şirkətinin direktoru Cavad Ouci deyib. Xəbəri "MEHR" agentliyi yayıb.
Oucinin sözlərinə görə, hazırda Pakistan "Sülh" layihəsi çərçivəsində öz ərazisində uzunluğu 700 km olan qaz kəmərinin tikintisinə başlayıb. "Yaxın vaxtlarda İranda yeddinci ümumi qaz kəmərinin Pakistan sərhədindək qalan 200 km-nin tikintisi başlayacaq", - Ouci qeyd edib.
Hazırda İran qazının Hindistana ixacı üzrə danışıqlar bu ölkənin "SAEG" şirkəti ilə aparılır.
İranın yeddinci ümumi boru kəmərinin Asuliyə-Bəndər-Abbas (422km) və Bəndər-Abbas-İranşəhr (480 km) sahələrində işlər başa çatıb. Qaz kəmərinin gücü sutkada 50 milyon kubmetr qaz təşkil edir. Qaz təzyiqinin artırılması üzrə doqquz yeni stansiya tikiləcək, bunun da nəticəsində boru kəmərinin gücü 110 milyon kubmetr qaza çatacaq.
Oucinin sözlərinə görə, Oman, Küveyt və Birləşmiş Ərəb Əmirlikləri İrandan təbii qaz almağı planlaşdırıblar.
"Yaxın vaxtlarda göstərilən ölkələrlə danışıqlara başlanılacaq", - Ouci qeyd edib.
