Azərbaycan, Bakı, 19 avqust/Trend/
İranda benzinin kvotasının azalması və qiymətinin artmasına görə, əvvəllər avtomobillərinə 20-30 litr benzin dolduran sürücülərin istehlak tələbatı 5-10 litrədək azalıb. Bu barədə "Bijan" yanacaqdoldurma məntəqələri sindikatının rəhbəri Hacı Məhəmmədrza bildirib. Xəbəri İranın "İLNA" agentliyi yayıb.
Onun sözlərinə görə, alıcılıq qabiliyyətinin azalması motosiklet sürücülərində də müşahidə edilir. "Motosikletçilər 1-2 litr benzin alırlar", - Məhəmmədrza deyib.
Bu yanacaqdoldurma məntəqələrində uzun növbələrə və böyük həcmli işdə az gəlirin əldə olunmasına səbəb olur, - o əlavə edib.
Onun fikrincə, sürücülərin sərbəst şəkildə satılan benzini 0,4 dollar qiymətinə ala bilməməsi səbəbindən, onlar avtomobillərini yanacaqla doldurmaq üçün gündə bir neçə dəfə yanacaqdoldurma məntəqələrinə müraciət etməli olurlar.
Hazırda İranda benzinə sutkalıq tələbat orta hesabla 65 milyon litr təşkil edir. Yerli zavodların sutkada 44 milyon litrdən çox benzin istehsal etmələrini nəzərə alaraq, İran xaricdən sutkada 21 milyon litrə yaxın benzin gətirməyə məcburdur.
2007-ci ilin yayından etibarən İranda benzinin satışına kvota tətbiq edilib. Şəxsi avtomobillər üçün ayda 100 litr kvota üzrə ayrılan benzin dövlət qiymətinə 0,1 dollar dəyərində satılır. Azad satışda (kvotadan artıq alışda) benzinin qiyməti 0,4 dollardır.
Yaxın iki ildə İran benzinin qiymətini beynəlxalq standartlara uyğun səviyyəyə qaldırmağı planlaşdırıb. Bəzi məlumatlara görə, beş il ərzində ölkədə benzinin qiyməti 0,8 dollara çatacaq.
