Azərbaycan, Bakı, 1 sentyabr /Trend, müxbir E.İsmayılov/
Bakı-Tbilisi-Ceyhan boru kəməri ilə ARDNŞ-nin "Dragon oil" və Türkmənistanda neft hasilatı ilə məşğul olan digər şirkətlərlə müqaviləsi çərçivəsində hər ay 200 min tonadək türkmən nefti nəql olunur. Bu barədə çərşənbə günü ARDNŞ prezidenti Rövnəq Abdullayev deyib.
"SOCAR Trading" nefti Türkmənistandakı istehsalçılardan alır, onu Xəzər dənizi vasitəsilə Bakıyadək nəql edir, Səngəçal terminalında Bakı-Tbilisi-Ceyhan boru kəmərinin giriş flansı var. "BTC Co" şirkəti neftin bu həcmini Bakı-Tbilisi-Ceyhan kəməri ilə nəql edir və Aralıq dənizindəki Ceyhan limanında onu "SOCAR Trading"ə təhvil verir.
Bundan əvvəl Bakı-Tbilisi-Ceyhan kəməri ilə "Tengiz" yatağından "Tengizchevroil" şirkətinin Qazaxıstan nefti nəql olunub, lakin nəql şərtlərinin razılaşdırılmaması səbəbindən neftin vurulması cari ildən dayandırılıb.
"BTC Co"nun səhmdarları aşağıdakılardır: bp (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "İtochu" (3,40 faiz ); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
Boru kəmərinin gücü sutkada 1,2 milyon barel neft təşkil edir.
