Azərbaycan, Bakı, 19 oktyabr /Trend, müxbir A.Yusifzadə/
13 zavodun daxil olduğu İranın ən böyük enerji holdinqlərindən biri olan "Sadid Industrial Group" Azərbaycanda enerji layihələrinin həyata keçirilməsində iştirak etmək niyyətindədir. Bu barədə Trend-ə holdinqin baş direktorunun müşaviri Vəliyulla Məhəbadi deyib.
"Sadid Industrial Group" 50 ildən çoxdur ki neft-qaz sahəsində layihələrin həyata keçirilməsi, boru istehsalı, poladtökmə istehsalı ilə məşğul olur.
"Biz Azərbaycanla həm dini mənada, həm də yaxın və dərin tarixi köklərə malik çox yaxın qonşu ölkələrik", - Məhəbadi bildirib.
"Sadid Industrial Group" holdinqinə daxil olan "Petco" şirkəti saatda gücü 50 min kubmetrədək olan nasos və turbinlərin istehsalı ilə məşğul olur", - Trend-ə "Petco" şirkətinin baş direktoru Məsud Tacrişi deyib. Zavod Təbrizdə yerləşir. Bu nasoslardan neft-kimya komplekslərində, xüsusən, dəniz suyunun ötürülməsində istifadə oluna bilər.
"Biz Azərbaycanın neft sahəsində işləyən şirkətlərlə, xüsusən, ARDNŞ-lə müqavilə imzalamaq və əməkdaşlıq etməyə ümid edirik", - Tacrişi qeyd edib.
"Petco" şirkəti gücü 10 meqavatadək olan kiçik və orta su-elektrik stansiyaları üçün su turbinləri də istehsal edir.
"Biz kiçik və orta su-elektrik stansiyalarının yaradılması layihələrinin həyata keçirilməsi üçün "Azərenerji" ilə müqavilə imzalayacağımıza ümid edirik", - Tacrişi vurğulayıb.
"Sadid" holdinqinə daxil olan "Saba Niroo" şirkəti - elektrik enerjisinin hazırlanması üçün külək turbinlərinin, eləcə də nanotexnologiyaların istehsalı ilə məşğul olan İranda yeganə və Yaxın Şərqdə birinci şirkətdir.
"Elektrik enerjisinin hazırlanması üçün külək turbinləri istehsalında böyük təcrübəni nəzərə alaraq, biz Azərbaycanla bu sahədə əməkdaşlıq etmək niyyətindəyik", - "Saba Niroo" şirkətinin baş direktoru Nadir Niktabə deyib.
