Azərbaycan, Bakı, 24 dekabr /Trend, müxbir E.İsmayılov/
2011-ci ildə ARDNŞ Bakı-Novorossiysk boru kəməri ilə 2 milyon ton neft göndərəcək. Bu göstərici bu il 2,25 milyon ton olub. Bu barədə cümə günü ARDNŞ-dəki mənbə deyib.
2011-ci ilin birinci rübündə ARDNŞ neft boru kəməri ilə 540 min ton neft göndərəcək. Bakı-Novorossiysk ilə birinci rübdə göndərilməsi planlaşdırılan ümumi həcmdən yanvar ayının payına 165 min ton, fevralın payına 210 min ton və martın payına isə 165 min ton düşür.
Mənbənin dediyi kimi, bu həcmlərin göndərilməsi ilə bağlı müraciət artıq ARDNŞ tərəfindən Rusiyanın "Transneft" şirkətinə göndərilib.
ARDNŞ 2009-cu ildə Bakı-Novorossiysk boru kəməri ilə 2,5 milyon tona yaxın neft ixrac edib. 2008-ci ildə bu göstərici 1,2 milyon ton olub.
ARDNŞ Novorossiysk vasitəsilə şəxsi yataqlarında hasil etdiyi neftin, eləcə də Azərbaycanda quruda işləyən birgə müəssisələrin və əməliyyat şirkətlərinin neftinin göndərişini həyata keçirir.
Azərbaycan neftin URALS növünü də Novorossiysk limanından satır. Buraya xammal Bakı-Novorossiysk boru kəməri ilə çatdırılır. Keyfiyyətli Azərbaycan nefti Rusiyanın boru kəmərləri şəbəkəsində digər növlərlə qarışdırılır və Novorossiysk limanında URALS adı ilə satılır. Bu növ spesifikliyinə görə Azərbaycan neftindən keyfiyyət və qiymətcə aşağıdır.