Azərbaycan, Bakı, 28 dekabr /Trend, müxbir E.İsmayılov/
BP şirkəti "Şahdəniz" yatağının işlənməsinin II mərhələsi çərçivəsində SDX-06 qiymətləndirmə quyusunun qazılması üzrə işləri 2011-ci il fevralın sonunadək tamamlaya bilər. Bu barədə çərşənbə axşamı neft-qaz bazarındakı mənbə məlumat verib.
Onun sözlərinə görə, quyunun qazılması qrafikə uyğun, "hər hansı bir problem və çətinlik olmadan" aparılır.
Hazırda layihə dərinliyi 6500 metr olan quyunun dərinliyi 5350 metrdir.
Bundan əvvəl mənbənin dediyi kimi, quyu suyun 100 metrliyində "İstiqlal" yarımdalma qazma quyusundan qazılır.
Hazırda "Şahdəniz" yatağında beş quyu var,onlardan biri qismən ləğv edilib və texniki vəziyyətinin pis olması ilə əlaqədar dondurulub. Eləcə də yatağın işlənməsinin birinci fazası çərçivəsində altıncı istismar quyusunun qazılması üzrə işlər görülür.
Yataqda ən yüksək hasilat 8,6 - 9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində qaz hasilatının həcmini ildə 25 milyard kubmetrə qədər artırmaq olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.