Azərbaycan, Bakı, 4 fevral /Trend/
ARDNŞ yanvarda (müştərək müəssisələr və əməliyyat şirkətləri istisna olmaqla) 10786 metr həcmində qazma işləri həyata keçirib. Bu göstərici 2010-cu ilin yanvarında 10463 metr təşkil edib. Trend-in məlumatına görə, bu barədə ARDNŞ-nin (Azərbaycan Respublikası Dövlət Neft Şirkəti) məlumatında deyilir.
Yanvar ayında ARDNŞ-nin həyata keçirdiyi qazma işlərinin ümumi həcmindən 10373 metr istismar, 413 metr isə kəşfiyyat qazmasının payına düşüb.
Bundan əvvəl ARDNŞ-nin rəhbəri Rövnəq Abdullayevin dediyi kimi, 2011-ci ildə şirkət 200 min metr qazma işini gerçəkləşdirməyi planlaşdırır. Xüsusilə də, qarşıya qoyulan məqsədə çatmaq üçün şirkət yeni qazma avadanlığının alınmasını nəzərdə tutur.
2010-cu ildə ARDNŞ 136,3 min metr həcmində qazma işi həyata keçirib. Bu göstərici 2009-cu ildə 168,2 min metr təşkil edib. Ötən il həyata keçirilən qazma işinin ümumi həcmindən 127,9 min metr istismar qazması, qalan 8466 metr kəşfiyyat qazmasının payına düşüb (o cümlədən 1785 metr struktur-axtarış qazması).