Azərbaycan, Bakı, 16 mart /Trend, müxbir E.İsmayılov/
Hazırda "Azerbaijan-Georgia-Romanian Interconnector" (AGRI) qaz nəqli layihəsinin həyata keçirilməsi çərçivəsində əsas məqsəd texniki-iqtisadi əsaslandırmanın hazırlanmasıdır. Trend-in məlumatına görə, bu barədə çərşənbə günü Azərbaycanın sənaye və energetika naziri Natiq Əliyev deyib.
Əliyevin sözlərinə görə, TİƏ-nin maliyyələşdirilməsinin iki variantı var. Birinci variant - Avropa İttifaqı maraqlı tərəf kimi TİƏ-nin hazırlanmasına qrant şəklində vəsaitlər ayıra bilər. İkinci variant - gələcəkdə layihənin maliyyələşdirilməsini planlaşdıran hansısa özəl şirkət qrant verərsə.
"Hazırda bu istiqamətdə işlər aparılır", - Əliyev qeyd edib.
AGRI layihəsi Azərbaycanın maye qazının Gürcüstanın Qara dəniz sahili ilə Rumıniyaya nəqlini nəzərdə tutur.
Sentyabrın 14-də Bakıda Azərbaycan, Gürcüstan, Rumıniya və Macarıstan AGRİ layihəsi üzrə Bakı Bəyannaməsini imzalayıblar. Sənəddə AGRI layihəsinin TİƏ-nin 2012-ci ilin aprelindən gec olmayaraq başa çatdırılmasının zəruriliyi göstərilib. Həmçinin, TİƏ-nin hazırlanması üçün zəruri maliyyələşdirmənin cəlb edilməsinə layihədə iştirak edən şirkətlərə dəstək göstərilməsi zəruriliyi də qeyd olunub. Sənəddə qeyd olunur ki, AGRI çərçivəsində işlərin gücləndirilməsi Azərbaycan qazının Avropa bazarlarına nəqlinin nisbətən daha qısa marşrutunun tapılmasını, Rumıniya-Macarıstan (Arad-Şeqed) interkonnektorunun yaradılmasını nəzərdə tutur.
Bundan əvvəl Rumıniyada AGRI layihəsi çərçivəsində yaradılan birgə müəssisə yeni layihənin texniki-iqtisadi əsaslandırması (TİƏ) və maliyyələşdirmə mənbələrinin axtarışı ilə məşğul olacaq.
Birgə müəssisənin iştirakçıları Rumıniyanın ROMGAZ, Gürcüstanın Neft-Qaz Korporasiyası, ARDNŞ və MVM şirkətləridir. BM-in iştirakçılarının hər biri 25 faizlik iştirak payına malikdir.
Bundan əvvəl Trend-ə Macarıstan Milli İnkişaf Nazirliyi yanında dövlət katibinin iqtisadiyyat və iqlim dəyişiklikləri üzrə müavini Peter Olajosun dediyinə görə, layihənin TİƏ-si 2012-ci ilin yayına hazır olacaq.
Layihə Azərbaycan qazının Gürcüstanın Qara dəniz sahilində qaz kəməri üzrə nəqlini nəzərdə tutur ki, bu qaz da xüsusi terminalda mayeləşdirilərək, tankerlərlə Rumıniyanın Konstansa limanı terminalında nəql olunacaq. Gələcəkdə maye qaz təbii qaz halına gətirilərək, ölkə ərazisində mövcud olan qaz infrastrukturu vasitəsilə Rumıniya, Macarıstan və digər Avropa ölkələrinin qaz tələbatını ödəmək üçün istiqamətlənəcək.
AGRI layihəsinin gücü üç variantda nəzərdə tutulur - ildə iki milyard kubmetr qaz, beş milyard kubmetr və səkkiz milyard kubmetr. İlkin məlumatlara görə, layihənin gücündən asılı olaraq, onun dəyəri 1,2 milyardla 4,5 milyard avro arasında dövr edir.
