Azərbaycan, Bakı, 1 iyul /Trend, müxbir A.Bədəlova/
2011-ci ilin birinci rübündə Azərbaycanın Avropa İttifaqı ölkələrinə neft tədarükü 39,682 milyon barel təşkil edib. Bu məlumatlar Avropa Komissiyasının rəsmi saytında yerləşdirilən hesabatda yer alıb.
Aİ-yə neft ixrac edən ölkələr arasında Azərbaycan ilin birinci rübündə 7-ci yeri tutub. Bu müddət ərzində ölkə tərəfindən neft tədarükünün həcmi Avropa İttifaqı ölkələrinə ixracın ümumi həcminin 4,43 faizini təşkil edib.
Məlumata əsasən, yanvar-mart ərzində Azərbaycan Aİ-yə CİF şərtləri əsasında bir barel üçün 106,99 dollar qiymətlə 4,245 milyard dollar məbləğində neft tədarük edib.
Martda Azərbaycanın Aİ ölkələrinə neft tədarükünün həcmi 1,724 milyard dollardan çox məbləğdə 14,757 milyon barel (CİF şərtləri əsasında bir barel üçün 116,86 dollar orta qiymətlə) təşkil edib. Fevralda bu göstərici 1,1 milyard dollara yaxın məbləğdə 10,568 milyard barel (bir barel üçün 104,04 dollar) olub.
2010-cu ildə Azərbaycan Aİ ölkələrinə 146,742 milyon barel, 2009-cu ildə 140,789 milyon barel, 2008-ci ildə 126,568 milyon barel, 2007-ci ildə 131,464 milyon barel, 2006-cı ildə 89,712 milyon barel, 2005-ci ildə 48,109 milyon barel neft tədarük edib.
