Azərbaycan, Bakı, 5 iyul /Trend, müxbir A.Axundov/
"Nabukko"nu Azərbaycansız təsəvvür etmək mümkün deyil, çünki respublika bu qaz kəmərinin əsas hissəsidir. Trend-in məlumatına görə, bu barədə çərşənbə axşamı Almaniyanın Federal İqtisadiyyat və Texnologiya Nazirliyinin nümayəndəsi Margit Sreffel deyib.
"Azərbaycan Avropa İttifaqının və Almaniyanın çox mühüm tərəfdaşıdır. Doğrudur, Azərbaycan "Nabukko" boru kəmərini təkbaşına doldurmaq imkanlarına malik deyil, lakin bu layihəni Azərbaycansız təsəvvür etmək mümkün deyil, çünki Azərbaycan onun əsas hissədir", - Şteffel bildirib.
Onun sözlərinə görə, Avropa İttifaqı kimi Almaniya da "Cənub dəhlizi" layihəsinə üstünlük verir.
"Digər layihələr qarşısında "Nabukko"nun üstünlüyü Avropanın qaz ehtiyatlarına birbaşa çıxışıdır. Bir çox yaxşı variantlar var, lakin "Nabukko"nun bu üstünlüyü var", - Şteffel bildirib.
İllik gücü 31 milyard kubmetr olan "Nabukko" qaz kəməri layihəsi Xəzər regionu və Yaxın Şərqdən qazın Aİ ölkələrinə tədarükünü nəzərdə tutur. Qaz kəmərinin tikintisinə 2013-cü ildə başlamaq nəzərə tutulub, onunla ilk tədarükün 2017-ci ildə başlayacağı güman edilir.
Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin BOTAŞ və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Ererji tədarükünün mənbə və marştutlarını diversifikasiya edəcək və bununla da Aİ-nin enerji təhlükəsizliyini artıracaq "Cənub dəhlizi" layihəsi Avropa İttifaqı üçün prioritet enerji layihələrindən biridir. "Cənub dəhlizi" layihəsinə aiddir: "Nabukko" qaz kəməri, Transadriatik qaz kəməri (TAP), "Ağ axın" və ITGI (Türkiyə-Yunanıstan-İtaliya qaz kəməri).