Azərbaycan, Bakı, 13 mart /Trend, müxbir E.İsmayılov/
Azərbyacanda karbamid istehsalı zavodunun inşası, vergilər istisna olmaqla, təxminən 500 milyon avroya başa gələcək. Trend-in məlumatına görə, bu barədə çərşənbə günü jurnalistlərə ARDNŞ prezidenti Rövnəq Abdullayev bildirib.
Abdullayevin sözlərinə görə, tikinti işlərinin 33 ay ərzində yekunlaşacağı proqnozlaşdırılır. Zavodun istismara verilməsi və məhsul istehsalı 2015-ci ilin sonlarında gözlənilir.
O qeyd edib ki, Azərbaycanda karbamid zavodunun tikintisində baş podratçı seçilən "Samsung Engineering" şirkəti, həmçinin Gürcüstanda tikiləcək karbamid və ammonyak zavodunun texniki-iqtisadi əsaslandırılmasını (TİƏ) hazırlayacaq. Koreya şirkəti Gürcüstan layihəsinin maliyyə mənbələrinin axtarışı prosesini təmin edəcək. TİƏ çərçivəsində şirkət karbamid və ammonyak istehsalının dəqiq nisbətini müəyyən edəcək.