Azərbaycan, Bakı, 3 iyun /Trend, müxbir E. İsmayılov/
Hazırda Azərbaycanda alternativ və bərpa olunan enerji əsasən su elektrik stansiyalarının elektrik enerjisi hasil etməsi sahəsində cəmləşib. Trend-in məlumatına görə, bu barədə bazar ertəsi Alternativ və Bərpa olunan Enerji Mənbələri üzrə Dövlət Agentliyinin rəhbəri Cəmil Məlikov Bakıda keçirilən "Baku Futures Forum" forum çərçivəsində deyib:
"Ölkədə hasil edilən elektrik enerjisinin təqribən 10 faizi su elektrik stansiyalarının payına düşür. Lakin ölkədə Günəş, külək enerjisinin generasiyası, kiçik su elektrik stansiyaların tikintisi üçün böyük imkanlar var".
Məlikov jurnalistlərə bildirib ki, artıq 2020-ci ilə elektrik enerjisinin istehsalının ümumi həcmində alternativ enerji mənbələrinin payının 20 faizədək çatdırılması planlaşdırılır. Bu, hazırda Nazirlər Kabineti tərəfindən baxılan alternativ enerjinin inkişafı üzrə strategiya çərçivəsində nəzərdə tutulub.
Onun sözlərinə görə, bütün müvafiq dövlət instansiyaları artıq bu strategiya üzrə bəzi düzəlişləri nəzərdə tutan öz rəy və tövsiyələrini təqdim ediblər.