Azərbaycan, Bakı, 5 iyun /Trend, müxbir E.İsmayılov/
"Azəri-Çıraq-Günəşli" (AÇG) neft-qaz yataqları blokunun işlənməsi layihəsi çərçivəsində 20 il ərzində 2,2 milyard barel neft hasil edilib. Trend-in məlumatına görə, bu barədə çərşənbə günü "Xəzər neft və qaz - 2013" konfransında "BP Azerbaijan" şirkətinin rəhbəri Qordon Birrel bildirib.
Q.Birrel qeyd edib: "Neft hasilatının azalması dayandırılıb və hazırda blokdan sabit olaraq 660 min barel neft hasil edilir. Xüsusilə də blokda hasilatın həcmini sabitləşdirməyə imkan verən 7 əsas istiqamət müəyyənləşdirilib".
"BP Azerbaijan" şirkətinin rəhbəri fəaliyyət istiqamətləri arasında quyuların qazılmasını, laylarda təzyiqin enməsinin idarə olunmasını, quyuların işinin optimallaşdırılmasını, təmir və başqa işlərin aparılmasını göstərib.
Birrel bildirib ki, BP-nin iştirakı ilə Azərbaycanda həyata keçirilən layihələrə ümumilikdə 40 milyard ABŞ dolları yatırıb: "Göstərilən müddət ərzində "Şahdəniz" qaz-kondensat yatağından 42 milyard kubmetr qaz və 88 milyon barel qaz-kondensat ixrac edilib. Hazırda "Şahdəniz" yatağında gündəlik qaz hasilatının həcmi 966 milyon kubfut və 55 min barel kondensat təşkil edir".
