Azərbaycan, Bakı, 2 oktyabr /Trend, müxbir Emil İsmayılov/
Bu ilin sonuna kimi Azərbaycanın Standartlaşdırma, Metrologiya və Patent üzrə Dövlət Komitəsi ARDNŞ-nin (Azərbaycan Respublikası Dövlət Neft Şirkəti) ölkədə tikdiyi neft-qaz emalı və neft məhsullarının istehsalı üzrə yeni kompleks üçün 100-ə yaxın standart qəbul edəcək. Bu barədə Trend-ə Dövlət Komitəsindən məlumat verilib.
Qurumdan bildiriblər ki, yeni kompleksin tikintisi və istismarı zamanı tətbiqi planlaşdırılan standartlar Dövlət Komitəsi yanında Standartlaşdırma və Sertifikatlaşdırma İnstitutu ilə ARDNŞ arasında imzalanan saziş əsasında hazırlanır. Layihənin birinci mərhələsinin həyata keçirilmə müddəti iki il, layihənin ümumi müddəti isə 8 ildir.
Komitədən deyiblər ki, layihə çərçivəsində işlər davam edir və saziş əsasında ümumilikdə təxminən minə yaxın yeni standart hazırlanacaq: "Yeni standartlar həm istehsal prosesinin özünə, həm də kompleksdə istehsal olunacaq məhsullara şamil ediləcək".
Saziş çərçivəsində Standartlaşdırma və Sertifikatlaşdırma İnstitutunun mütəxəssisləri yeni kompleksin tikintisi və istismarı zamanı beynəlxalq və regional sertifikatların aktuallığını öyrənəcəklər, Azərbaycan dilinə tərcümə edilmiş standart layihələrinin dilçilik, orfoqrafiya və dövlət standartları sisteminə uyğunluğunun ekspertizasını aparacaqlar.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
