Azərbaycan, Bakı, 8 oktyabr /Trend, müxbir Emil İsmayılov/
Azərbaycan Respublikası Dövlət Neft Şirkətinin (ARDNŞ) "Azəriqaz" İstehsalat Birliyi (İB) 2014-cü ilin yanvar-sentyabr aylarında Azərbaycan istehlakçılarına təqribən 3 milyard kubmetr qaz tədarük edib. Bunu çərşənbə günü Trend-ə İB-dən deyiblər.
İB-dən qeyd ediblər ki, "Azəriqaz"in yanvar-sentyabrda istehlakçılara tədarük etdiyi qazın ümumi həcmindən təqribən 1,65 milyard kubmetri əhali qrupundan olan istehlakçıların payına düşüb.
Ötən ilin analoji dövründə əhali qrupundan olan istehlakçılara 1,46 milyard kubmetrdən çox qaz tədarük olunub.
İB-dən bildiriblər ki, cari ilin yanvar-sentyabrında digər qrupdan olan istehlakçılara 1,34 milyard kubmetrdən artıq qaz tədarük olunub. İB sentyabrda abonentlərə 196 milyon kubmetr qaz tədarük edib, bu həcmdən təqribən 65 milyon kubmetri əhali qrupundan olan istehlakçıların, 131 milyon kubmetri isə digər abonentlərin payına düşüb.
2014-cü ilin oktyabrın 1-nə olan vəziyyətə görə, Azərbaycanda qaz operatorunun 1 708 329 abonenti var.
