Bakı. Trend:
Dünya Bankı "Azəriqaz"ın Azərbaycanda qaz sızmasının aşkarlanması
və təmiri qurğusu layihəsinin yeni təsdiq tarixini açıqlayıb.
Trend bu barədə Banka istinadən xəbğr verir.
Layihənin təsdiq tarixi 23 aprel 2026-cı il tarixindən 21 may tarixinə dəyişdirilib.
Layihənin məqsədi “Azəriqaz”ın idarə etdiyi qazpaylayıcı şəbəkədə sızma nəticəsində yaranan metan emissiyalarını azaltmaq və şirkətin aktivlərinin idarə edilməsi potensialını gücləndirməkdir.
Maliyyələşdirmənin həcmi 15 milyon dollardır.
Layihə “Azəriqaz” qazpaylayıcı sistemində qaz sızmalarının aşkar
edilməsi və təmiri üçün alıcı tərəfindən idarə olunan maliyyə
mexanizminin yaradılmasını nəzərdə tutur. Mexanizm Məşəldə Yanma və
Metanın Azaldılması üzrə Qlobal Tərəfdaşlığın (GFMR) trast fondunun
ilkin qrantı ilə işə salınacaq. SOCAR qrant alan və qrant hesabı
sahibi kimi çıxış edəcək, “Azəriqaz” isə layihənin gündəlik
icrasına və idarə olunmasına cavabdeh olan yeganə benefisiar və
icraçı qurum kimi fəaliyyət göstərəcək. Metan emissiyalarının
mərhələli şəkildə azaldılmasına yönəlmiş razılaşdırılmış sızmaların
aşkar edilməsi və təmiri fəaliyyətləri üçün SOCAR-dan “Azəriqaz”a
vəsait yenidən ayrılacaq.
Layihə “Azəriqaz”ın Bakıda qaz sızmasının ilkin səviyyəsinin
yaradılması üzrə pilot proqramının təcrübəsinə əsaslanacaq. Təmir
işləri əvvəlcədən razılaşdırılmış uyğunluq meyarlarına uyğun olaraq
“Azəriqaz” tərəfindən təklif olunacaq və həyata keçiriləcək.
Fəaliyyətlərin prioritetləşdirilməsi xərc, mürəkkəblik, təsir və
digər müvafiq amillərə əsaslanaraq xərclənən dollara düşən
emissiyanın maksimum azaldılmasını təmin edəcək.
Bundan əlavə, GFMR vəsaitləri – ilkin və sonrakı – OGMP 2.0 standartına uyğun olaraq, “Azəriqaz”ın emissiyaların monitorinqi, hesabatı və yoxlanılması potensialının inkişaf etdirilməsi üçün istifadə olunacaq.