Azərbaycan Dövlət Neft Şirkətinin Geofizika və Geologiya İdarəsi Amerikanın "Input/Output" şirkəti 3600 kanal seysmik stansiya və digər avadanlıqların tədarükünə dair saziş bağlayıb. Trend in xəbər verdiyi kimi, bu barədə ARDNŞ-in mətbuat xidmətindən məlumat verilib.
İdarə rəhbəri Taleh Həsənovun bildirdiyinə görə, alınan avadanlıq idarəyə həm Azərbaycanda, həm də ölkə hüdudlarında geofiziki kəşfiyyat üzrə tenderlərdə iştirak etməyə və qalib gəlməyə imkan yaradacaq. Sazişin bu yaxınlarda imzalanması gözlənilir.
Avadanlıqların alınması 2015 -ci ilə qədər Dövlət Neft Şirkətinin geofiziki və geoloji kompleksinin inkişafı proqramı çərçivəsində həyata keçirilir. Bu işlər tenderlərdə iştirak etmək, bəzi əməliyyat şirkətlərinin seysmik kəşfiyyat və sənaye geofizikası üzrə sifarişlərini gerçəkləşdirmək üçün görülür.
