Azərbaycan hələ 2006-2007-ci ilin qış dövründə Gürcüstana elektrik enerjisinin tədarük edilməsi haqqında həmin ölkə ilə qəti razılaşma əldə etməyib. Razılaşma bir sıra texniki məsələlərin həllindən sonra əldə olunacaq. Bu barədə Trend ə "Azərenerji" səhmdar cəmiyyətindən məlumat verilib. Gürcü tərəfi bu təkliflə çıxış edib, hazırda elektrik enerjisinin ötürülmə və qaytarılma mexanizmi hazırlanır.
O cümlədən, elektrik enerjisinin gürcü tərəfinə günün hansı vaxtında veriləcəyi, onun qaytarılma müddətləri və digər şərtlər müzakirə olunur. Hazırda gürcü tərəfinin elektrik enerjisinə görə artıq Azərbaycana borcu var.
Bu günə qədər qalan borc 10 mln. kVt/s elektrik enerjisi həcmində qiymətləndirilir. Borc Gürcüstanın enerji obyektlərindəki problemlərin həllindən sonra qaytarılacaq.
Əvvəl gürcü tərəfi elektrik enerjisi üzrə Azərbaycana olan borcunu qaytarmağa başlamışdı. Hazırda gürcü tərəfi təxminən 20 mln. kVt/s elektrik enerjisi həcmində olan borcdan təxminən 10 mln. kVt/s elektrik enerjisini qaytarıb.
Həmin borc 90-cı illərdə tədarük edilmiş elektrik enerjisindən qalıb. Gürcü tərəfinin Azərbaycana təxminən 32 mln. kVt/s elektrik enerjisi həcmində ümumi borcu var.
Ölkələr arasında fövqəladə hallarda enerji idarələrinin əməkdaşlığı haqqında yeni razılaşmalar var.