ARDNŞ-in tərkibinə daxil olan "Azneft" İB-nin Yataqların Modelləşdirilməsi Mərkəzi "Şimali Binəqədi" yatağında bir qədər əvvəl qazılmış quyuların məlumatlarının rəqəmləndirilməsini həyata keçirir. ARDNŞ-dən Trend ə verilən məlumata görə, işlər "Binəqədi Oil" əməliyyat şirkətinin sifarişi əsasında həyata keçirilir.
ARDNŞ təmsilçisinin sözlərinə görə, mərkəz, əsasən, quyuların karotaj verilənləri əsasında elektron baza yaradır. "Yataq dərin olmayan - 1 min metrə qədər laylara malikdir. Baza yaradıldıqdan sonra petrofiziki işlər həyata keçiriləcək və yatağın elektron geofiziki modeli yaradılacaq", - deyə ARDNŞ-dən bildiriblər.
"Binəqədi" quru yataqları blokunda kəşfiyyat, reabilitasiya, işlənilmə və hasilatın pay bölgüsünə dair saziş iyunun 18-də Bakıda ARDNŞ və AZEN şirkəti (eyni pay bölgüsü ilə Türkiyənin ENKA və Azərbaycanın AzPetrol şirkətlərinin birgə müəssisəsi) arasında imzalanıb. Həmin sazişdə 25 % ARDNŞ-ə, 75% isə AZEN-ə məxsusdur. ARDNŞ-in iştirak payının maliyyələşdirilməsi AZEN şirkəti tərəfindən həyata keçiriləcək.
Sazişin şərtlərinə əsasən, AZEN üç il ərzində müqavilə sahəsində neftin sutkalıq hasilatını 1,5 dəfə artırmaq barədə öhdəlik üzərinə götürür. Şirkət həmçinin $1 mln. məbləğində bonus ödəyəcək. Ümumi sahəsi 4,3 min ha olan blok 1896-cı ildən işlənilir. Onun ümumi geoloji ehtityatları 132 mln. ton neft, çıxarılan - 12,8 mln. ton təşkil edir. Hal-hazırda sutkalıq neft hasilatı 286 tondur (2003-cü ildə 106 min ton).