Azərbaycan, Bakı /müx. Trend S.Əliyev/ Bu vaxtadək İran energetikləri Naxçıvan Muxtar Respublikasında sərhədyanı elektrik stansiyalarının tikintisinə dair protokola cavab verməyiblər. Bu barədə cümə axşamı məlumat verən "Azərenerji" Səhmdar Cəmiyyətinin vitse-prezidenti Marlen Əsgərov bildirib ki, Azərbaycan tərəfi artıq protokolun öz variantını hazırlayıb. Lakin bu sənəd İran tərəfi ilə razılaşdırılmalıdır.
Qeyd edək ki, bir müddət öncə tərəflər Naxçıvan Muxtar Respublikasında sərhədyanı elektrik stansiyalarının tikintisi layihəsinin şərtlərini razılaşdırıblar. Bu layihə muxtar respublikanın Ordubad rayonunda Araz çayı üzərində iki stansiyanın inşasını nəzərdə tutur. Stansiyaların biri Azərbaycan (Ordubad SES), digəri isə İran (Marazad SES) tərəfində yerləşməlidir.
Onu da bildirək ki, layihəyə əsasən hər iki tərəfdə eyni gücdə stansiyaların tikilməsi planlaşdırılır. Azərbaycan İran tərəfinin inşa edə bilmədiyi 45 MVt-lıq stansiya tikmək niyyətindədir. Hazırda qərara alınıb ki, əgər İran bu gücdə stansiya inşa edə bilməsə belə, Azərbaycan bunu öz ərazisində gerçəkləşdirəcək.
Araz çayının su resurslarından paritet əsasında istifadə ediləcək. Stansiya derivasiya tipli olacaq. Yəni obyektlər çayın ayrılma qollarında yerləşəcək və bu üzdən də burada su anbarının tikintisi nəzərdə tutulmur. Bu isə o deməkdir ki, su digər məqsədlər üçün istifadə edilməyəcək və geri çaya axıdılacaq.
