Azərbaycan,Bakı/müxbir Trend V.Şərifov/"Totsa" ticarət şirkəti Azərbaycan Dövlət Neft Şirkətinin (ADNŞ) tenderində ilin ikinci yarısında yüklənmə ilə 500 min ton L-62 markalı dizel yanacağı əldə edib. Bu barədə çərşənbə günü ADNŞ-dən məlumat verilib.
Neft məhsulu Azərbaycan-Gürcüstan dəmir yolu vasitəsilə Gürcüstanın Qara dəniz limanları - Batumi və Poti limanlarına göndəriləcək. ADNŞ nümayəndəsinin sözlərinə görə, birinci rübdə 300 min ton dizel yanacağı "Addax" treyderinə satılıb.
Azərbaycan-Gürcüstan bazarlarında çalışan treyderlərin məlumatına əsasən, "Addax" yüksək nəqliyyat xərclərinə baxmayaraq, ADNŞ-in neft məhsullarını tez bir zamanda mənimsəyib.
"Adax FCA şərti ilə ADNŞ-nin neft məhsullarını alıb və son zamanlar treyderin Gürcüstan limanlarına qədər neft məhsullarının çatdırılması üzrə yüksək nəqliyyat xərcləri olub", deyə bazardakı mənbə bildirib.
Yanvar-apreldə Bakının neft emalı zavodları 666 min ton dizel yanacağı istehsal edib. Bu da 2006-cı ilin analoji dövründən 7,5 faiz azdır. Dövlət Statistika Komitəsinin məlumatına əsasən, bu neft məhsulunun anbar ehtiyatları mayın 1-nə əsasən 10,6 min ton təşkil edib.
