Azərbaycan, Bakı/ Trend / Hollandiyanın Rotterdam məhkəməsində Maltanın "FİM Bank"ının Azərbaycan dövlətinə qarşı iddiası ilə əlaqədar şifahi məhkəmə iclası keçirilib. Bu barədə məlumatı Rabitə və İnformasiya Texnologiyaları Nazirliyinin mətbuat xidməti verib. Məhkəmə iclasında ilk söz "FİM Bank"ı təmsil edən "Loyens & Loeff " hüquq şirkətinə verilib.
Azərbaycan tərəfi iddiaçının nümayəndəsinin arqumentlərini təkzib edərək verdiyi kreditə görə "FİM Bank"ın tam məsuliyyət daşıdığını, qanunvericiliyə görə kredit verərkən araşdırma aparılmasının zəruriliyini, uğursuz maliyyə əməliyyatına görə bankın tam cavabdehlik daşıdığını məhkəmənin diqqətinə çatdırıb. Məhkəmə iclasında təqdim olunmuş sübut və dəlillərlə əlaqədar ətraflı izahat verilib, "FİM Bank"ın iri səhmdarlarından olan Küveytin "Kuwati Interests for Financial Investment" şirkətinin eyni zamanda kredit verilmiş "Poçtbank" SİB-in səhmdarı olması hakimlərin nəzərinə çatdırılıb.
Azərbaycanda fəaliyyət göstərən "Poçtank"ın 20% Küveytin Kuwaiti Interests for Financial Investment (KIFI) şirkətinin olmuşdur. Bu Küveyt şirkəti həm də "FIM Bank"ın əsas təsisçisidir və şirkətin rəhbəri eyni zamanda FIM Banka rəhbərlik edir. "Poçtbank"-ın külli miqdarda borcu yarandığından "FIM Bank"dan kredit istəyib. "FIM Bank" isə öz növbəsində Azərbaycan hökuməti adından müəyyən sənədlər təqdim edildikdən sonra vəsait verə biləcəyini bildirib. "Poçtbank" saxta sənədlər hazırlayıb qarşı tərəfə təqdim edib. "FIM Bank"da bu sənədlərin həqiqi olmadığını bilsələr də ikitərəfli razılaşmalar nəticəsində kredit verib.
"FIM Bank"a təqdim olunmuş saxta sənədlərdə göstərilib ki, guya Rabitə Nazirliyinə məxsus olan "Aztell" və "Baktell" şirkətləri (əslində bu şirkətlər mövcud olmayıb) üçün telekommunikasiya avadanlıqları alınacaq və həmin vəsaitin geri qaytarılmasına isə guya Rabitə Nazirliyi zəmanət verir.
"Poçtbank" saxta sənədlərə əsasən "FIM Bank"dan aldığı krediti geri qaytara bilməyib və beləliklə, iki bank arasında aparılan maliyyə əməliyyatı uğursuzluqla nəticələnib.
"FIM Bank"ın 6 dekabr 2007-ci il tarixində Rotterdam məhkəməsində şahidlərin dindirilməsi ilə əlaqədar məhkəmə iclasının keçiriləcəyini nəzərə alaraq məhkəmə qərarının çıxarılmasının təxirə salınması vəsatəti Azərbaycan tərəfinin təkidi ilə məhkəmə tərəfindən qəbul edilməyib. Məhkəmə 20 noyabr 2007-ci il tarixində prosesilə əlaqədar qərar verəcəyini müəyyənləşdirib.
"FIM Bank"ın verdiyi iddia ərizəsi nəticəsində Azərbaycanın Hollandiyadakı "New Skies Satellites N.V." peyk rabitəsi şirkətindəki 50 000 ədəd səhminə Rotterdam məhkəməsinin 15 iyun 2004-cü il tarixli qərarı ilə həbs qoyulub. 21 iyul 2004-cü il tarixində "FIM Bank"ı təmsil edən "Loyens & Loeff " hüquq şirkəti Rotterdam məhkəməsində Azərbaycan dövlətinə qarşı iddia qaldırıb.