Azərbaycan, Bakı, 03 mart / Trend , müxbir S.Babayeva / "Xalq kompüteri" layihəsi işçi qrupunun növbəti iclası martın birinci yarısına planlaşdırılıb. Bu haqda bazar ertəsi Rabitə və İnformasiya Texnologiyaları Nazirliyinin İnformasiya Cəmiyyətinin İnkişafı şöbəsinin rəhbəri Rüfət Gülməmmədov məlumat verib.
"Bu, layihənin reallaşdırılmasında mühüm görüş olacaq. Azərbaycan hökuməti və "Microsoft" korporasiyası öz təkliflərini təqdim edəcək" - deyə Gülməmmədov bildirib. İşçi qrupu təkliflərin təqdim olunmasını layihənin keçən iclasında qərara alıb.
"Xalq kompüteri" layihəsinin mahiyyəti əhalinin aztəminatlı təbəqəsinə aşağı faizlərlə uzunmüddətli kreditlə kompüterlərin verilməsidir. Layihə üç il müddətinə nəzərdə tutulub. Lakin bəzi düzəlişlərin ediləcəyi də gözlənilir. Layihənin ümumi dəyəri hələ müəyyən olunmayıb.
Cari ildə əhalinin aztəminatlı təbəqəsinə təqdim olunmaq üçün 10 min kompüterin alınması nəzərdə tutulur. İlkin mərhələdə kompüterlərin müəllimlər və tələbələr arasında paylanması məsələləri müzakirə olunur.
Rabitə Nazirliyinin hesablamalarına görə, Azərbaycanda hər 100 nəfərə dörd-beş kompüter düşür. "Xalq kompüteri" layihəsinin gerçəkləşməsi nəticəsində bu rəqəmi beş dəfədən çox artırmaq mümkün olacaq.