Azərbaycan, Bakı, 25 iyun / Trend , müxbir S.Babayeva/ Rotterdam Məhkəməsi Malta "FIMbank"ı ilə Azərbaycan hökuməti arasındakı maliyyə məhkəmə çəkişməsinə dair qərarın vaxtını təxirə salıb.Azərbaycan hökumətinin maraqlarının müdafiəsi Rabitə və İnformasiya Texnologiyaları Nazirliyinə tapşırılıb.
Nazirliyin kadrlar və hüquq şöbəsinin rəhbəri Bəxtiyar Məmmədovun çərşənbə günü verdiyi məlumata görə, qərarın iyunda elan olunması planlaşdırılmışdı, lakin dekabr ayına təxirə salınıb.
"Onlar (Məhkəmə) bu qərarı işin mürəkkəbliyi və işə baxılması üçün müəyyən (Əlavə) vaxta ehtiyacın olması ilə əlaqələndirirlər", - deyə o bildirib.
Rabitə Nazirliyi lazım olan bütün sənədləri, ən əsası, Fransa Məhkəməsinin Azərbaycanın xeyrinə qəbul etdiyi qərarı məhkəməyə təqdim edib
Malta "FIMbank"ı (First International Merchant Bank Ltd.) Azərbaycanın iki telekommunikasiya şirkətinə dövlət zəmanəti altında verilən, ümumi həcmi 4,5mln. dollar məbləğində olan kreditin ödənməsi tələbi ilə Azərbaycan hökumətinə qarşı iddia ilə çıxış edib. "FIMbank"ın ilk iddiası 2004-cü ilin iyulunda Rotterdam və Paris məhkəmələrinə təqdim olunub.
