Azərbaycan, Bakı, 07 avqust / Trend , müxbir S.Babayeva/ Ümumdünya Poçt İttifaqının (Universal Postal Union-UPU) Cenevrədə keçirilən XXIV Ümumdünya Poçt Konqresində Azərbaycan Administrasiya Şurası və Poçt Əməliyyatları Şurasına üzv seçilib. Bu barədə UPU-nın məlumatında bildirilir.
Konqresdə Azərbaycanı başda nazir müavini İltimas Məmmədov olmaqla Rabitə və İnformasiya Texnologiyaları Nazirliyinin (RİTN) nümayəndə heyəti təmsil edir.
Administrasiya Şurasının tərkibinə MDB ölkələrindən Azərbaycandan savayı Qazaxıstan, Rusiya və Ukrayna da daxil olub.
Keniya Administrasiya Şurasının sədri seçilib. Poçt Əməliyyatları Şurasının sədri avqustun 8-də seçiləcək.
RİTN-dan əvvəllər verilən məlumata görə, Ümumdünya Poçt İttifaqının Administrasiya Şurasına üzvlük təşkilatda ölkə maraqlarının ifadə edilməsi baxımından olduqca mühümdür. 41 ölkənin daxil olduğu şuranın bütün üzvləri onun fasiləsiz işini təmin edir və fəaliyyətinə nəzarət edir, həmçinin onun nəzarət, administrasiya, qanunverici və hüquqi fəaliyyətini həyata keçirir.
Konqresin qərarına əsasən, UPU-nın baş direktor vəzifəsinə növbəti müddətə - 2009-cu ildən 2012-ci ilədək yenidən fransalı Eduard Dayan (Edouard Dayan) seçilib. O, bu posta ilk dəfə 2004-cü ildə Buxarestdə keçirilən Konqres zamanı seçilib. Konqres öz işini avqustun 12-də başa çatdıracaq.
Azərbaycan 1993-cü ilin aprel ayından UPU-nın və eyni zamanda, Buxarestdə keçirilən əvvəlki Konqres zamanı seçilən Administrasiya Şurasının üzvüdür.
