Azərbaycan, Bakı, 12 noyabr / Trend , müxbir H.Vəliyev/
Avialaynerlərdən zənglərin həyata keçirilməsi üçün Azərbaycanda peyk texnologiyası fəaliyyət göstərəcək. Bu barədə Dövlət Radiotezliklər İdarəsinin (DRİ) baş mühəndisi İlham Əfəndiyev Trend -a müsahibəsində bildirib. O, bu yaxınlarda 1800 MHz tezlikdə fəaliyyət göstərən GSM avadanlıqlarının avialaynerlərdə istifadəsinə imkan yaradan qərarla bağlı məsələni şərh edib.
Avialayenlərdə GSM avadanlıqlarının istifadəsinə icazə verən qərar DRİ-nin 31 oktyabrda keçirilən iclasında qəbul edilib.
Uçuş zamanı təsbit edilmiş GSM terminalları imkansız olduğundan zənglərin həyata keçirilməsi üçün peyk rabitəsi sistemindən istifadə ediləcək. Yerdə xidmətlərdən istifadə nəzərdə tutulmur, belə ki, mövcud olan mobil rabitə operatorlarının lokal şəbəkəsi 1800 MHz tezlikdə fəaliyyət göstərdiyi üçün bu, şəbəkələrarası interferansiyanın yaranmasına səbəb olur.
Təyyarə avadanlığının istifadəsi üçün DRİ-də qeydiyyatdan keçmək lazımdır. Əfəndiyevin fikrincə, avialaynerlərdə rabitə sisteminin tətbiqi gələcəkdə aviabiletlərin qiymətinə də təsir edə bilər.
Mobil rabitə hazırda bir çox ölkələrdə təcrübədən keçir. Böyük Brtitaniyada hava gəmilərinin bortunda böyük olmayan baza stansiyaları quraşdırılır. Bu stansiya təyyarə müəyyən hündürlüyə qalxan kimi işə düşür. Peyk vasitəsilə bu stansiyalar yerə siqnal göndərir, oradan da xüsusi avadanlıq onu bilavasitə telefona yönəldir.
Məqalə müəllifi ilə əlaqə ünvanı: [email protected]
