Аzərbaycan, Bakı, 18 may /Trend, müxbir H.Vəliyev/
Azərbaycanın mobil rabitə operatoru "Azərfon" MMC 3G şəbəkəsinin genişləndirilməsi üzrə işlər aparır. Bu barədə şirkətin korporativ əlaqələr üzrə meneceri Elşad Fərzəliyev Trend-ə bildirib.
Fərzəliyevin sözlərinə görə, Xaçmaz rayonunun Nabran istirahət zonasında telekommunikasiya avadanlıqlarının quraşdırılması üzrə işlər aparılır. Yay mövsümündə burada istirahət edənlərin sayı xeyli artdığına görə, əsas diqqət radioötürücülərin yaxşılaşdırılmasına yönəldilib.
3G avadanlığının quraşdırılması abunəçilərə ənənəvi səs xidmətləri ilə yanaşı, məlumatların yüksək sürətlə ötürülməsi, mobil televiziya, videozənglər və digər rabitə xidmətlərini göstərməyə imkan yaradacaq.
3G mobil rabitə şəbəkəsi məlumatların yüksək sürətlə ötürülməsi ilə xarakterizə olunur. 3G-də yüksək sürət 3,5 Mbit/s-a çatır ki, bu da internetə sürətli giriş, elektron ünvan və əlavə edilmiş fayllarla işləmək rahatlığını təmin edir.
Hazırda "Azərfon" mobil operatorunun 3G şəbəkəsi Bakı, Abşeron yarımadası və Sumqayıtla yanaşı, Gəncə, Şirvan, Naxçıvan, Mingəçevir, Şəki, Tovuz və Şəmkirdə də yayılıb. Şirkətin gələcək planlarında bütün respublika üzrə 3G-nin genişlənməsi nəzərdə tutulur.
Bu gün "Azərfon" şəbəkəsi abunəçilərinin sayı 1,5 milyon təşkil edir.
