...

Azərbaycanın Təhsil Nazirliyi "Elektron təhsil" müsabiqəsi iştirakçılarının qeydiyyatını başa çatdırıb

Telekommunikasiya Materials 25 May 2010 16:45 (UTC +04:00)

Аzərbaycan,Bakı, 25 may /Trend, müxbir H.Vəliyev/

"Elektron təhsil" respublika müsabiqəsi iştirakçılarının qeydiyyata alınma prosesi başa çatıb. Bu barədə Azərbaycan Təhsil Nazirliyinin Təhsil Sisteminin İnformasiyalaşdırılması İdarəsindən verilən məlumatda deyilir.

Müsabiqənin əsas məqsədi təhsil prosesində elektron təhsil resursları və internet texnologiyalarının tətbiq edilməsinin geniş yayılması, təhsil ictimaiyyətinin bu sahədə maarifləndirilməsi, həmçinin təhsil prosesində informasiya texnologiyalarını fəal şəkildə tətbiq etməklə müəllimlərin stimullaşdırılmasıdır.

İdarədən verilən məlumata görə, Təhsil Nazirliyi tərəfindən təşkil olunmuş ikimərhələli səsvermə münsiflər heyəti tərəfindən aparılacaq.

Nazirlik tərəfindən elan edilən "Təhsildə İKT ili" çərçivəsində özündə əsas istiqamətləri əks etdirən müsabiqə 2008-2012-ci illərdə Azərbaycanda təhsil sisteminin informasiyalaşdırılması üzrə dövlət proqramı çərçivəsində həyata keçirilir.

Hazırda müsabiqəyə 810 layihə təqdim edilib. Müsabiqə iki istiqamətdə təşkil edilib: "Müasir məktəbdə elektron təhsil resursları" və "Təhsildə internet texnologiyaları".

"Müasir məktəbdə elektron təhsil resursları" istiqamətində keçirilən müsabiqəyə "Fənlərin tədrisində informasiya texnologiyalarının tətbiqi üzrə ən yaxşı metodika" nominasiyası üzrə 307, "İbtidai təhsil sistemində informasiya texnologiyalarının tətbiqi üzrə ən yaxşı metodika" nominasiyası üzrə 155, "Elektron təhsil resurslarının istifadəsi ilə bağlı hazırlanmış ən yaxşı təhsil prosesi modeli" nominasiyası üzrə 297 layihə təqdim olunub.

"Təhsildə internet texnologiyaları" istiqamətində keçirilmiş müsabiqəyə "Təhsildə internet resursları" nominasiyası üzrə 32, "Müəllimlərin rifahı" nominasiyası üzrə 19 layihə təqdim edilib.

Beş nominasiya üzrə hər qalibə noutbuklar, netbuklar və digər mükafatlar veriləcək.

Xəbər lenti

Xəbər lenti