Azərbaycan, Bakı, 24 avqust /Trend, müxbir H.Vəliyev/
Azərbaycan MDB ölkələrində kitabxanalararası abunə (KAA) sistemində kitabxana göndərişləri üçün güzəştli poçt tariflərinin tətbiqi haqqında Regional Rabitə Əməkdaşlığı (RRƏ) Poçt Rabitəsi Operatorları Şurasının müzakirələrində iştirak edəcək. Bu barədə RRƏ-nin məlumatında deyilir.
Bu məsələ avqustun 26-da Kişinyovda keçiriləcək RƏƏ-nin poçt rabitəsi komissiyasının 31-ci iclası ilə RRƏ Poçt Rabitəsi Operatorları Şurasının 20-ci birgə yubiley müşavirəsinin gündəliyinə daxil edilib.
İclasın ardınca RRƏ rabitə administrasiyaları mütəxəssisləri üçün beynəlxalq seminarlar təşkil olunacaq: "Müştərilər nəzərə alınmaqla bazarların və poçt xidmətlərinin inkişafı" və"Poçt ödənişləri xidmətlərinin inkişafı və möhkəmlənməsi" mövzusunda olan bu seminarlar avqustun 24-25-də keçiriləcək. Seminarlarda poçt xidmətlərinin inkişafı, poçt sahəsində müasir nailiyyətlərə, "direct mail" (birbaşa ünvan göndərişləri) bazarının inkişafı, elektron poçt ödənişləri, maliyyə xidmətləri və s. məsələlərə baxılacaq.
İclaslarda Azərbaycanı "Azərpoçt" MMC baş direktorunun müavini Sübhan Kazımov təmsil edəcək.
Bu gün KAA sistemində güzəştli poçt tariflərinin tətbiqi məsələsi hələlik bütün birlik ölkələri tərəfindən yekdilliklə təsdiqlənməyib.
Birlik ölkələrinin poçt idarələri arasındakı razılaşmaya uyğun olaraq, MDB-nin bəzi ölkələrində məktub və bağlamalar MDB tarifləri üzrə deyil, xarici ölkələrin tarifi üzrə və yalnız təyyarə poçtu vasitəsilə göndərilir ki, bu da kitabın öz qiymətini ötüb-keçir. Bu gün azərbaycanlı istifadəçinin tələb etdiyi və çəkisi bir kiloqram olan kitabın təyyarə poçtu vasitəsilə göndərişinin qiyməti 26-36 manat arasındadır.
Bu problemin həl olunması üçün MDB iştirakçısı olan dövlətlərin KAA sistemində güzəştli poçt tarifləri haqqında sazişin layihəsi hazırlanıb. Orada nəzərdə tutulub ki, birlik ölkələrinin KAA sistemində poçt göndərişlərinin mövcud dəyərinin 50 faizini təşkil edən sənədlərin göndərişi güzəştli tariflər əsasında həyata keçiriləcək. Saziş qeyri-müəyyən müddətə imzalanacaq. Sazişin şərtləri ilə razılaşan və ondan irəli gələn öhdəlikləri yerinə yetirməyə hazır olan bütün dövlətlər ona qoşula bilər.
Kazımov bir qədər əvvəl Trend-ə bildirdiyinə görə, Rusiya və Belarus tərəfi güzəştli poçt tarifləri haqqında sənədin yenidən işlənməsini zəruri hesab edirlər.
MDB üzvü olan dövlətlərin KAA sistemində kitabxana göndərişləri üçün güzəştli poçt tarifləri haqqında saziş layihəsi ekspert qrupu tərəfindən razılaşdırıldıqdan sonra, onun baxılmaq üçün Birlik Ölkələri Dövlət Başçıları Şurasına təqdim edilməsi planlaşdırılır.
