Azərbaycan, Bakı, 1 dekabr /Trend, müxbir H.Vəliyev/
Azərbaycanın İT şirkəti AZEL ölkənin avtomatlaşdırılmış bank sistemi bazarının 25 faizinə nəzarət edir. Bu barədə çərşənbə günü AZEL şirkətinin prezidenti İqor Yakovenko deyib.
Yakovenkonun sözlərinə görə, bu yaxınlarda şirkət Azərbaycanın daha bir bankı ilə avtomatlaşdırılmış bank sistemi PROGRESS-in tətbiqinə dair müqavilə imzalayıb.
"PROGRESS sisteminin tətbiqi üzrə işlər artıq başlayıb və ümid edirik ki, 2011-ci ilin ilk aylarında tam tətbiq ediləcək. Bu günə sistem mövcud 45 bankdan 15-də tətbiq edilib ki, bu da AZEL şirkətinin Azərbaycanda avtomatlaşdırılmış bank sistemi bazarının 25 faizindən çoxuna nəzarət etməsi barədə danışmağa əsas verir", - Yakovenko bildirib.
PROGRESS avtomatlaşdırılmış bank sisteminin yeni versiyası şirkət tərəfindən ilin əvvəlində təqdim edilib. O, SAP NetWeaver inteqrasiya bazasına əsaslanır. Əvvəllər isə sistem "Oracle" platformasına əsaslanıb.
Sistem bu komponentlərdən ibarətdir: PROGRESS-2020, SAP BusinessObjects və SAP CRM. Ona Azərbaycanın bank sahəsində lazım olan qaydalar, qurulma və hesabatlar daxildir. Sistemdə bank qanunvericiliyində və Azərbaycan Mərkəzi Bankının tələblərində baş verən dəyişikiliklər öz əksini tapıb.
Sistem kreditlər, depozitlər, pul köçürmələri, internet bankçılığı, prosessinq mərkəzləri ilə qarşılıqlı fəaliyyət və digər bank xidmətləri daxil olmaqla, bank əməliyyatlarını həyata keçirməyə imkan verir.
AZEL rəhbərinin sözlərinə görə, şirkət "Oracle" ilə strateji tərəfdaşlığı möhkəmləndirərək, bazarda əvvəllər "iFlex" kimi tanınan "Oracle Financial"in qərarlarını təqdim edir.
"Biz bunu da kifayət qədər yaxşı qərar hesab edirik, bununla bağlı bir sıra banklarda bu sistemin tətbiqinə dair danışıqlar aparırıq", - AZEL rəhbəri deyib.