Azərbaycan, Bakı, 27 dekabr /Trend, müxbir H.Vəliyev/
2011-ci ildə Azərbaycanın mobil rabitə operatorlarının billinq sistemlərinin manat tarifinə tam keçəcəyi gözlənilir. Bu barədə Trend-ə bazar ertəsi Rabitə və İnformasiya Texnologiyaları Nazirliyinin Tənzimləmə şöbəsinin müdiri Əliyar Təmirov deyib.
Təmirovun sözlərinə görə, bu məsələ operatorlarla müzakirə mərhələsindədir, son qərar onların texniki hazırlığından asılı olacaq.
Bu günə Azərbaycan Rabitə və İnformasiya Texnologiyaları Nazirliyi tərəfindən ölkənin mobil rabitə operatorlarına billinq sistemlərinin manat tarifləşməsinə keçidi barədə göstəriş verilib. Nazirlik nümayəndələri və operatorlar bu istiqamətdə lazımi işləri görmək üçün qarşılıqlı fəaliyyət haqqında qərar qəbul edblər.
Bu gün billinq sistemini tamamilə pul vahidləri ilə tarifləşdirən yeganə operator "Azerfon" MMC-dir. Bakcell və Azercell operatorlarının manta tarifinə tam keçidi onların bu istiqamətdə keçirdikləri işlərin sürətindən asılı olacaq.
"BakuTel-2010" telekommunikasiya sərgisi çərçivəsində Azercell rəhbəri Əli Ağan açıqlayıb ki, billinq sisteminin manata keçirilməsi 2011-ci ilin ikinci rübündə gözlənilir.
Türkiyənin rabitə operatorları hökumətin ciddi tələbindən sonra pul tarifinə keçdikdən sonra Azərbaycanda manat tarifinə keçid də aktual məsələyə çevrilib.
Bu gün mobil rabitə operatorlarının abunəçiləri konturlardan təkcə danışıq üçün deyil, həm də çoxmedialı kontentin əldə olunması, bir sıra ölkələrdə isə ictimai nəqliyyatda gedişə görə ödənişlər üçün də istifadə edirlər. Danışıq vaxtı ödəniş vasitəsinə çevrilir, kontur sisteminin mövcud olması isə mikroödəmələrin həyata keçirilməsi zamanı problemlər yaradır. Çünki abunəçi bu və ya digər kontentin və xidmətin əldə olunması zamanı ödəyəcəyi məbləğ barədə təsəvvürə malik olmur.
Manat tarifinə keçid operatorlar qarşısında bir sıra mürəkkəb məsələlər qoyacaq ki, onlar da bunu həll etməli olacaqlar. Operatorlar marketinq sistemini köklü surətdə dəyişməli, texniki xarakterli məsələləri həll etməli, billinq sistemini yenidən sazlamalı olacaqlar.
