Azərbaycan, Bakı, 14 mart /Trend, müxbir H.Vəliyev/
"Elektron məktəb" (e-School) layihəsinə Azərbaycanın üç regional məktəbi də qoşulub. Bu barədə bazar ertəsi Trend-ə Azərbaycanın Təhsil Nazirliyi yanında Təhsil Sisteminin İnformasiyalaşdırılması İdarəsindən deyiblər.
"Elektron məktəb" layihəsinə Gəncə, Lənkəran və Şirvanın orta məktəbləri qoşulub. Hazırda zəruri avadanlıqların quraşdırılması, sistemlərin instalyasiyası və müəllim heyətinə təlimlərin keçirilməsi üçün şəraitin yaradılması üzrə işlər görülür.
Məktəblərin xüsusi təhsil keçən müəllimləri elektron jurnallardan və elektron resursların idarə edilməsi proqramlarından istifadəyə başlayacaqlar.
Bütün məktəblər yüksəksürətli İnternet şəbəkəsinə və Təhsil sisteminin informasiyalaşdırılması idarəsində yerləşən təhsil şəbəkəsinə çıxış imkanı əldə edəcəklər. Bu gün "e-School" layihəsinə qoşulan məktəblərin ümumi sayı 23-ə çatıb.
Təhsil şəbəkəsi həllindən istifadə şagirdlərin valideynləri üçün də mümkün olacaq. Onlar təhsil portalı vasitəsilə (www.edu.az) öz uşaqlarının müvəfəqqiyyət dərəcəsi haqqqında məlumat əldə edə biləcəklər. Bunun üçün məktəb tərəfindən verilən istifadəçini adı və paroldan istifadə etmək vacibdir.
Layihə "2008-2012-ci illər üçün Azərbaycanda təhsil sisteminin informasiyalaşdırılması üzrə Dövlət Proqramı" çərçivəsində həyata keçirilir.