...

Azərbaycan Rabitə Nazirliyi internet-servis-provayderlərin fəaliyyətinə nəzarəti gücləndirir

Telekommunikasiya Materials 12 Aprel 2011 14:31 (UTC +04:00)

Azərbaycan, Bakı, 12 aprel/Trend, müxbir H.Vəliyev/

Azərbaycan Rabitə və İnformasiya Texnologiyaları Nazirliyi internet-servis-provayderlərin fəaliyyətinə nəzarəti gücləndirir. Bu barədə çərşənbə axşamı Trend-ə rabitə və informasiya texnologiyaları nazirinin müavini İltimas Məmmədov bildirib.

Məmmədovun sözlərinə görə, bu tədbirlərin başlıca məqsədi son istifadəçiyə göstərilən internet xidmətlərinin keyfiyyətinin yaxşılaşdırılmasıdır.

Nəzarət Azərbaycan Rabitə və İnformasiya Texnologiyaları və İqtisadi İnkişaf nazirliklərinin aidiyyəti qurumları tərəfindən aparılır.

Nazir müavininin sözlərinə görə, nazirlik tərəfindən provayderlərin istifadəçilər qarşısında öz öhdəliklərini yerinə yetirib-yetirməməsini yoxlamaq üçün onların tarif planlarının mütəmadi monitorinqi aparılır.

"Monitorinqlər tərəfimizdən mütəmadi aparılır. Onların aparılmasında əsas məqsəd ondan ibarətdir ki, provayder son istifadəçi qarşısında öz öhdəliklərinin yerinə yetirilməsinə görə məsuliyyət daşısın. Yəni istifadəçi ödəniş etdiyi tarif həcminə əsasən həmin həcmi əldə etsin", - Məmmədov qeyd edib.

Pozuntular aşkar edildikdə provayder bildiriş alır, bundan sonra istifadəçilər qarşısında öz öhdəliklərini yerinə yetirmədikdə, provayderə qarşı müvafiq tədbirlər görülür.

Bununla yanaşı, nazirlik internet-servis-provayderlərin biznesinin genişləndirilməsinə kömək edir. Nazirlik tərəfindən ilin əvvəlində "Aztelekom" və "Bakı Telefon Tabitəsi" istehsalat birliklərinin rəhbərliyinə özəl internet-servis-provayderlərin biznesinin inkişafı üçün lazımi şəraitin yaradılmasına kömək göstərilməsi barədə tapşırıq verilmişdi.

Bu tədbirlər nazirliyə dəfələrlə dövlət rabitə operatorlarının telekommunikasiya qovşaqları vasitəsilə bəzi provayderlərə öz bizneslərinin inkişaf etdirilməsində maneələr yaratması barədə şikayətlərin daxil olması ilə əlaqədar görülüb.

Nazir Əli Abbasov operatorların öz şəbəkələrində genişmiqyaslı qoşulmaların inkişafı üçün zəruri olan hər şeyi etməyi də tapşırıb. Onun fikrincə, bu, onların bir abonentə (ARPU) bu gün 16 manata çatan xidmətin genişzolaqlı internet sayəsində satışından əldə olunan orta aylıq gəlir göstəricilərini bilavasitə yaxşılaşdıra bilər.

Bundan başqa, hazırda nazirlik tərəfindən hazırlanan yeni konsepsiya son istifadəçi üçün daha əlverişli olmasını təmin etmək məqsədilə genişzolaqlı internetdən istifadə imkanlarının genişləndirilməsini nəzərdə tutur.

Konsepsiyada operatorların telekommunikasiya qovşaqlarında genişzolaqlı internet portlarının sayının artırılmasını, tariflərin azaldılmasını, təklif olunan tarif planlarının sayının artırılmasını, multimedia xidmətlərinin göstərilməsi üçün infrastrukturun inkişafını, kontent-xidmətlərin (bank xidmətləri, elektron ticarət və s.) genişləndirilməsini nəzərdə tutur.

Azərbaycanın Rabitə və İnformasitya Texnologiyaları Nazirliyinin statistikasına görə, 2010-cu ilin sonuna olan vəziyyətə görə, respublikada internetin yayılma səviyyəsi 12 faiz təşkil edib. Nazirliyin hesablamalarına görə, 2011-ci ildə genişzolaqlı çıxış bazarında artım təxminən 40 faiz təşkil edəcək.

Son ilyarım ərzində Azərbaycanda internet tarifləri səkkiz-doqquz dəfə azaldılıb və bu gün 1 Mbit/s sürətlə ADSL xidmətinə qoşulma üzrə orta qiymət 20 manat təşkil edir.

Xəbər lenti

Xəbər lenti