Azərbaycan, Bakı, 24 sentyabr /Trend, müxbir H.Vəliyev/
Azərbaycanın Rabitə və İnforfmasiya Texnologiyaları Nazirliyinin "Aztelekom" İstehsalat Birliyi ilin əvvəlindən genişzolaqlı internet şəbəkəsinin inkişafına üç milyondan çox investisiya qoyub. Bu barədə şənbə günü Trend-ə İB-nin baş direktoru Məhəmməd Məmmədov bildirib.
Məmmədovun sözlərinə görə, hazırda operator tərəfindən bir milyon manat məbləğində avadanlıq alınır.
"Avadanlığın tədarükü ayın sonlarına gözlənilir. Onun quraşdırılması ilin sonunadək başa çatacaq. Bununla yanaşı, BMT-nin inkişaf proqramı çərçivəsində üç milyon manatlıq əlavə avadanlığın alınmasını planlaşdırırıq", - o deyib.
İB rəhbərinin sözlərinə görə, dövlət rabitə operatorunun genişzolaqlı internet şəbəkəsi xidmətləri üzrə abunəçilərin sayı (özəl internet-servis-provayderlərin genişzolaqlı qoşulmaları nəzərə alınmaqla) 50 minə çatır.
Əlavə avadanlıqların alınması operatora öz genişzolaqlı portlarının sayını regional səviyyədə 30 min ədəd artırmağa imkan verir ki, bu da öz növbəsində, operator tərəfindən 20 rayon mərkəzində və 143 kənddə genişzolaqlı internet xidmətlərinin verilməsi imkanlarını genişləndirəcək.
Hazırda AztelekomNet genişzolaqlı internet-provayderinin istifadəçilərinin ümumi sayından 3,5 faizi kəndlərdə yerləşir.
İB-dən Trend-ə deyildiyi kimi, "Aztelekom" 2013-cü ilin sonunadək şəbəkəsinə genişzolaqlı qoşulmaların səviyyəsini 30 faizə çatdıracaq. Bu istiqamətdə işlərə artıq başlanılıb və bu işlər operatorun strategiyasına uyğun həyata keçirilir. Həmin strategiya genişzolaqlı çıxış portlarının sayının artırılması üçün zəruri telekommunikasiya avadanlıqlarının quraşdırılmasını nəzərdə tutur.
Hazırda operatorun genişzolaqlı şəbəkəsi bütün rayon mərkəzlərini əhatə edir. "Aztelekom"dan Trend-ə bildirildiyi kimi, ilin sonunadək şəbəkə bütün iri yaşayış məntəqələrini və qəsəbələri əhatə edəcək. "Aztelekom"un strategiyasına görə, 2012-ci ildə bütün respublika ərazisi genişzolaqlı rabitə şəbəkəsi ilə əhatə olunacaq, 2013-cü ildən isə istifadəçilərin sayının artırılması və xidmət dairəsinin genişləndirilməsi üzrə irimiqyaslı işlər görüləcək.
