Azərbaycan, Bakı, 10 dekabr / Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutu (İTİ) və Bolqarıstanın Elmlər Akademiyası informasiya texnologiyaları sahəsində əməkdaşlığın aspektlərini müzakirə ediblər. Bu barədə İTİ-nin cümə günü yaydığı məlumatda deyilir.
Bu sahədə iki ölkənin elmi müəssisələrinin əməkdaşlığının perspektivləri İTİ-nin direktoru Rasim Əliquliyevin BEA prezidenti Nikola Sabitonovla görüşü çərçivəsində müzakirə olunub.
Tərəflər innovativ infrastrukturun formalaşması, innovasiya fəaliyyətinin təşkili, elmi-texniki və istehsalat sahələrində əməkdaşlıq imkanlarını nəzərdən keçiriblər. Bolqarıstan tərəfi alimlərin intellektual əməklərinin xarici bazarlara çıxarılmasını da nəzərdən keçirir.
Müzakirələrdə proqram mühəndisliyi, GRID-sistemlər və "buludlu hesablamalar" sahəsində mütəxəssislərin hazırlanması üzrə əməkdaşlığın vacibliyi qeyd olunub, informasiya təhlükəsizliyi, viruslarla mübarizə metodlarının hazırlanması sahəsində əməkdaşlığın mümkünlüyündən danışılıb.
